سوال: ایک عورت امید سے ہے، اس کے شوہر کو مغالطہ لگا کہ اس کی بیوی نے طلاق کا مطالبہ کیا ہے، تو اس نے اسٹیمپ پیپر پر دو گواہوں کی موجودگی میں تین طلاقیں دے دیں، لیکن حقیقت یہ ہے کہ بیوی نے طلاق کا مطالبہ کیا ہی نہیں تھا۔
معلوم یہ کرنا ہے کہ کیا طلاق واقع ہوگئی ہے؟ اور کیا اب رجوع کی کوئی صورت ہے؟

جواب: واضح رہے کہ طلاق غلط فہمی میں دی جائے، عام حالت میں دی جائے یا حالت حمل میں دی جائے، ہر صورت میں طلاق واقع ہو جاتی ہے۔
سوال میں ذکر کردہ صورت میں تین طلاقیں واقع ہو کر حرمتِ مغلظہ ثابت ہوگئی ہے، اور رجوع کا حق ختم ہو گیا ہے۔
تین طلاقیں دینے کی صورت میں عدت کے دوران رجوع کا حق باقی نہیں رہتا ہے، اور نہ ہی عدت گزرنے کے بعد اس شوہر سے نکاح ہو سکتا ہے، جب تک کسی اور مرد سے نکاح نہ کرے اور اس کے ساتھ حقوق زوجیت ادا نہ کرے، پھر اگر وہ طلاق دیدے یا انتقال کر جائے، تو عدت گزرنے کے بعد طرفین کی رضامندی سے نئے مہر اور دو گواہوں کی موجودگی میں اسی شخص سے دوبارہ نکاح کیا جا سکتا ہے۔