سوال: جسم کے غیر ضروری بال کاٹتے وقت اگر خون آنا شروع ہو جائے اور وقت کی کمی کی وجہ سے خون کا پتہ نہ لگے کہ جاری ہے یا ختم ہو گیا ہے اور وه خون کپڑوں پر لگ جائے، تو کیا ان کپڑوں میں عبادت ہو جائے گی؟

جواب: خون نجاستِ غلیظہ ہے، اس کے لگنے سے کپڑا ناپاک ہوجاتا ہے، ایسے کپڑے میں پڑھی گئی نماز کا حکم یہ ہے کہ اگر خون کی مقدار ایک درہم یا ہاتھ کی ہتھیلی کے گہراؤ سے کم ہو، تو یہ نماز کراہت کے ساتھ ادا ہوجائے گی، لیکن اگر اس کی مقدار ایک درہم یا اس سے زیادہ ہو، تو اس کپڑے کو دھونا واجب ہے، اس کپڑے میں نماز ادا کرنا درست نہیں ہے، تاہم اگر کسی نے ایسے کپڑوں میں دھوئے بغیر نماز ادا کرلی، تو خون کے ایک درہم سے زیادہ ہونے کی صورت میں نماز ہی نہیں ہوگی، جسے دوبارہ پڑھنا ہوگا، اور ایک درہم کے برابر ہونے کی صورت میں نماز مکروہِ تحریمی ہوگی، جس کا حکم یہ ہے کہ وقت کے اندر اندر اس کو لوٹانا واجب ہے، اور اگر وقت میں نہیں لوٹا سکے، تو وقت گزرنے کے بعد بھی اس کو لوٹانا مستحب ہے، البتہ وقت کے بعد واجب نہیں ہے۔