سوال: سوال یہ ہے کہ لڑکا لڑکی چھپ کر نکاح کرتے ہیں، لڑکی کے والدین کی مرضی نہیں ہے اور لڑکے کے گھر والے راضی ہیں، تو وہ دونوں بھاگ کر نکاح کرتے ہیں۔
لڑکی بہت ایجوکیٹ ہے، والد بزنس مین، گھر کروڑوں کا ہے، بہت خوبصورت بھی ہے، اور لڑکی شوق سے جاب بھی کرتی تھی، بیس ہزار سیلری تھی، جو اسی کے پاس آتے تھے، اس کا اپنا بینک اکاؤنٹ بھی تھا۔
جب شادی ہوگئی تو لڑکے کے پاس کچھ بھی نہیں نکلا، نہ اس،کی جاب تھی اور نہ ہی اس کے پاس کوئی اپنی ذاتی بائیک تھی، گھر بھی رینٹ کا تھا، جس میں قبضہ کر کے رہ رہے تھے، مالک مکان نے پولیس کی مدد لے کر وہ گھر بھی خالی کروانے کے در پے تھا۔
لڑکی نے اپنے ذاتی پیسوں سے لڑکے کو بائیک دلوائی، موبائل دلوایا اور پولیس کے معاملات ختم کرنے کے لیے اپنے زیور بھی بیچ دیئے۔
لڑکی کو یہ سب شادی کے بعد پتہ چلا، اس شخص نے لڑکی کو بھی دھوکہ دیا، لڑکی کے والدین تو پہلے سے ہی اس رشتہ سے راضی نہیں تھے۔
اب بچے ہوگئے، لڑکی نے بھی compromise کرلیا ہے، اگر والدین کوئی action بھی لینا چاہیں، تو لڑکی ساتھ نہیں ہے، اس کا کہنا ہے کہ میں اب اسی کے ساتھ رہونگی۔
اس صورت میں مفتی صاحب رہنمائی فرمادیں کہ شرعاً ان کا نکاح ہوا بھی ہے یا نہیں؟

جواب: واضح رہے کہ والدین کی رضامندی اور سرپرستی کے بغیرنکاح کرنا اکثر بے برکتی، بے اتفاقی اور آپس کی ناراضگیوں اور مستقبل میں پریشانیوں کا سبب بنتا ہے، جس سے احتراز کرنا چاہیے، لیکن اگر شرعی شرائط کے مطابق کوئی لڑکی اپنا نکاح کرے، تو ایسا نکاح منعقد ہوجاتا ہے۔
لہٰذا صورتِ مسئولہ میں اگر لڑکی عاقلہ بالغہ ہے، اور اس اپنی مرضی سے مہرِ مثل کے ساتھ شرعی شرائط کے مطابق ایسے لڑکے سے نکاح کیا ہے، جو اس کا کفو ہے، (یعنی لڑکا اپنی دینداری، مالداری، خاندانی شرافت اور حسب نسب میں لڑکی کے خاندان کے برابر یا اس سے اعلیٰ ہے) تو یہ نکاح منعقد ہوگیا ہے، ایسی صورت میں ان دونوں کا ایک ساتھ رہنا جائز ہے۔

ليكن اگر یہ نکاح کفو میں نہیں ہوا، (جیسا کہ سوال کے ظاہر سے معلوم ہوتا ہے) تو ایسا نکاح شرعا منعقد ہو جاتا ہے، البتہ اولاد ہونے سے پہلے پہلے تک لڑکی کے اولیاء کو عدالت سے رجوع کرکے اس نکاح کو فسخ کرنے کا اختیار حاصل رہتا ہے۔