سوال: مفتی صاحب! مرد و عورت پر حج فرض ہونے کی وضاحت فرمادیں۔ اور فرض ہونے کے باوجود نہ کرنے کی صورت میں کیا حکم ہے؟ اس کی وضاحت فرمادیں۔

جواب: ۱) جس شخص کے پاس اس کی حاجات اصلیہ اور حج سے واپس آنے تک اس کے اہل وعیال کے نفقہ کے علاوہ اتنی رقم ہو، جو حج کے تمام اخراجات کیلئے کافی ہو یا نقد رقم تو نہ ہو، لیکن اس کی ضروریات سے زائد اتنی جائیداد یا مالِ تجارت موجود ہو، جس کو فروخت کرکے حج کے اخراجات کے بقدر رقم حاصل ہوجائے تو دونوں صورتوں میں وہ شخص صاحبِ استطاعت شمار ہوگا اور اس پرحج فرض ہو جائے گا۔
عورت پر حج فرض ہونے کے متعلق تفصیل یہ ہے کہ اگر اس عورت کے ساتھ حج پر جانے کیلئے محرم یا شوہر اپنے خرچ پر حج کے لیے جانے پر تیار ہو تو عورت پر حج فرض ہوگا، لیکن اگر عورت کا شوہر یا کوئی محرم اپنے خرچ پر ساتھ جانے کے لیے تیار نہ ہو تو عورت پر حج کی ادائیگی فرض ہونے کے لیے اپنے سفرِ حج کے اخراجات کے ساتھ شوہر یا محرم کے سفرِ حج کے اخراجات کا انتظام کرنا بھی شرط ہوگا، لہٰذا اگر کوئی محرم اپنے خرچ پر ساتھ جانے والا نہ ہو اور عورت کے پاس اپنے اور محرم کے سفری اخراجات نہ ہوں تو اس پر فی الحال حج کی ادائیگی فرض نہیں ہوگی۔
2) اگر کسی شخص پر حج فرض ہو اور اس کا انتقال ہوجائے، تو اگر اس نے مرنے سے پہلے حج بدل کی وصیت کی ہو، تو اس کے ایک تہائی (1/3) ترکہ سے اس کی طرف سے حج بدل کیا جائے گا، اور اگر وصیت نہیں کی ہو، تو اگر ورثاء اپنی صوابدید پر اس کی طرف سے حج بدل کریں گے، تو اللہ تعالیٰ سے امید ہے کہ اس کا حج قبول فرماکر گناہوں کو معاف کردیں گے، البتہ اس صورت میں ورثاء پر میت کی طرف سے حج کرنا لازم نہیں ہے۔