سوال: السلام علیکم، مفتی صاحب! اگر صرف نکاح ہوا ہو، رخصتی نہ ہوئی ہو، تو میاں بیوی کا ملنا کیسا ہے؟ رہنمائی فرمادیں۔

جواب: نکاح کے بعد رخصتی سے پہلے میاں بیوی کا ایک دوسرے کی خیریت معلوم کرنا، ایک دوسرے کو دیکھنا، ملنا، بات چیت کرنا شرعاً درست ہے، اور اس میں کوئی گناہ نہیں ہے۔
البتہ رخصتی سے پہلے ازدواجی تعلقات قائم کرنے کو عرف و معاشرے میں معیوب سمجھا جاتا ہے، کیونکہ اگر بیوی کو حمل ٹھہر جائے، تو کسی کو کیا معلوم کہ اس کی وجہ کیا ہے؟ بسا اوقات یہ چیز بڑے فتنہ کا باعث بن جاتی ہے۔
اسی طرح بعض اوقات مزاجوں کی ہم نا آہنگی اور چھوٹی عمروں کی نا تجربہ کاریاں رخصتی سے پہلے ہی فتنوں کا سبب اور بعض اوقات نکاح کے ٹوٹنے کا سبب تک بن جاتی ہیں، لہذا رخصتی سے پہلے ازدواجی تعلقات قائم کرنے سے اجتناب کرنا چاہیے۔