سوال: السلام عليكم، احناف كے نزدیک ناپاک زمین کو پاک کرنے کے جو تین طریقے ہیں، وہ بتادیں۔

جواب: واضح رہے کہ زمین کی ساخت مختلف ہونے کی وجہ سے اس پر لگی ہوئی نجاست کو پاک کرنے کے مختلف طریقے بیان کیے گئے ہیں، جو کہ درج ذیل ہیں:
1- اگر زمین کچی یا کھردری ہو اور اس میں پانی وغیرہ جذب ہو جاتا ہو، اگر ایسی زمین پر مائع (liquid) نجاست لگ جائے، تو اس زمین کے خشک ہونے سے وہ زمین پاک ہو جاتی ہے۔
2- اگر زمین سخت ہو، مثلاً ٹائل ماربل وغیرہ کا فرش ہو، یا سیمنٹ کا ایسا فرش ہو، جو بہت ملائم ہو، اور اس میں پانی وغیرہ جذب نہ ہوتا ہو، تو ایسی زمین پر اگر مائع نجاست لگ جائے، تو اسے پاک کرنے کا طریقہ یہ ہے کہ اس زمین کو پانی سے تین مرتبہ دھویا جائے، پھر خشک کپڑے سے اسے صاف کر لیا جائے، یا اس فرش پر اتنی مقدار میں پانی بہایا جائے، جس سے نجاست کا اثر زائل ہو جائے، اس طرح کرنے سے وہ فرش خشک ہونے کے بعد پاک ہو جائے گا۔
3- اگر پکی زمین مثلاً: ٹائل ماربل وغیرہ کے فرش پر نجاست خشک ہو جائے، اور نجاست کا اثر زائل ہو جائے، تو ایسی صورت میں وہ فرش پاک سمجھا جائے گا، تاہم احتیاط کا تقاضہ یہ ہے کہ اسے بھی پانی سے دھو کر پاک کر لیا جائے۔