سوال: مفتی صاحب ! اگر امتحانات کی تیاری کر رہے ہوں یا کررہی ہوں اور وہ امتحانات بورڈ کے ہوں تو کیا ان کی تیاری کے لیے تراویح کی نماز چھوڑ سکتے ہیں۔

جواب: تراویح سنتِ موکدہ ہے، بلا عذر اس کو چھوڑنے کی عادت بنانے والا یا غیر اہم سمجھ کر چھوڑنے والا گناہ گار ہے، خلفاءِ راشدین، صحابہ کرام، تابعین، تبع تابعین، ائمہ مجتہدین اور سلفِ صالحین سے مستقل پابندی کے ساتھ تراویح پڑھنا ثابت ہے، لہذا تراویح کا خوب اہتمام کرنا چاہیے، البتہ اگر کبھی عذر کی وجہ سے چھوٹ جائے، تو اگرچہ گناہ نہیں ہوگا، لیکن بڑی خیر سے محرومی کا باعث ہو گا۔
واضح رہے کہ امتحانات کی تیاری کرنا کوئی شرعی عذر نہیں ہے، جس کی وجہ سے تراویح ترک کی جائے، اور اگر صرف امتحانات کی تیاری کی وجہ سے تراویح کو ترک کیا جائے، تو یہ بڑی محرومی کی بات ہے، لہذا امتحانات کی تیاری کے لیے متبادل انتظام کرنا چاہیے اور تروایح میں ہرگز سستی نہیں کرنی چاہیے۔