سوال: السلام علیکم، مفتی صاحب! میری شادی کو پانچ سال ہوگئے ہیں، کوئی اولاد نہیں ہے، اگر اولاد کے حصول کی نیت سے کعبہ کا طواف کیا جائے، تو اس مىں کوئی حرج تو نہیں؟ اگر اس طرح نیت کرنا صحیح نہ ہو، تو طواف کرتے ہوئے کیا نیت کی جائے گی؟ اور طواف کرتے ہوئے کتنے چکر لگاسکتے ہیں؟ رہنمائی فرمادیں۔
تنقیح :
محترمہ ! آپ اس بات کی وضاحت کریں کہ آپ کی مراد حج اور عمرہ کے موقع پر واجب طواف کا طریقہ کار اور اس کی نیت پوچھنی ہے یا نفلی طواف کا؟
نیز آپ کی مراد اولاد کے حصول کے لیے نفلی طواف ہے؟ یا حج عمرہ کے موقع پر واجب طواف؟
اس وضاحت کے بعد ہی آپ کے سوال کا جواب دیا جاسکتا ہے۔
جواب تنقیح:
جی مجھے اولاد کے حصول کے لیے نفلی طواف کرنا ہے، کتنے چکر لگا سکتی ہوں؟

جواب: حدیث مبارکہ میں طواف کو نماز کے مثل کہا گیا ہے، لہذا کسی جائز حاجت کے پورا کرنے کے لیے نفلی نماز کی طرح نفلی طواف کرنا بھی جائز ہے، اور نفلی طواف کے سات چکر ہیں۔
واضح رہے کہ دوران طواف مطاف، ملتزم اور میزابِ رحمت کے نیچے دعائیں قبول ہوتی ہیں، لہذا دوران طواف ان مقامات پر نیک اولاد کے حصول کے لیے خصوصی دعائیں مانگنی چاہیے۔