سوال: السلام علیکم، مفتی صاحب! اگر کسی خاتون کا بار بار miscarriages ہو، تو کیا کیا جائے؟ ڈاکٹرز کہتے ہیں کہ ٹیسٹ رزلٹ وغیرہ سب ٹھیک ہے،
ایک عالم سے پوچھا تھا، وہ کہتے ہیں کہ سخت نظر لگی ہوئی ہے یا کسی نے کچھ کروایا ہے، براہ مہربانی آپ کوئی ایسا عمل یا وظیفہ بتادیں کہ ہماری یہ پریشانی حل ہوجائے۔

جواب: ہر تکلیف و آزمائش اور غم و خوشی اللہ تعالیٰ کی طرف سے ہے، اس لیے توبہ و استغفار کے ذریعے اللہ تعالیٰ کو راضی کرنے کی کوشش کرنی چاہیے۔
اس کے ساتھ ساتھ درج ذیل باتوں کا اہتمام فرمائیں:
1. پنج وقتہ نماز کا اہتمام کریں، ہر نماز کے بعد خوب دعا مانگنے کا اہتمام کریں۔
2. صلاۃ الحاجت پڑھ کر اللہ تعالیٰ سے دعا کریں۔
3. "دعاءِ کرب" کثرت سے پڑھیں:
’’لَا إِلٰهَ إِلَّا اللهُ الْعَظِیْمُ الْحَلِیْمُ، لَا إِلٰهَ إِلَّا اللهُ رَبُّ الْعَرْشِ الْعَظِیْمِ، لَا إِلٰهَ إِلَّا اللهُ رَبُّ السَّمَاوَاتِ وَرَبُّ الْأَرْضِ وَرَبُّ الْعَرْشِ الْکَرِیْمِ‘‘.
4۔صبح و شام سات سات مرتبہ درج ذیل تسبیح پڑھیں:
’’حَسْبِىَ اللَّهُ لاَ إِلَهَ إِلاَّ هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ‘‘.
5۔ يَا حَيُّ يَا قَيُّومُ بِرَحْمَتِكَ أَسْتَغِيثُ کثرت سے پڑھیں۔
6۔ کثرت سے استغفار پڑھیں۔
7۔ حسب توفیق صدقہ بھی دیں۔
ان شاءاللہ! اللہ تعالیٰ آسانی فرمادے گا۔