سوال: السلام علیکم، مفتی صاحب! میری بہن نے خود کشی کی دھمکی دیتے ہوۓ مجھے اپنی بیوی کو طلاق دینے کو کہا، تین طلاقوں کا طلاق نامہ میرے سامنے لکھا گیا، مجھے معلوم تھا اس میں تین طلاقیں لکھی ہوئی ہیں، میں نے اس پر دستخط کردیئے، آیا اس طرح طلاق دینے سے طلاق ہوجاتی ہے یا نہیں؟ براہ کرم رہنمائی فرمائیں۔

جواب: واضح رہے کہ زبانی طلاق کی طرح تحریری طلاق بھی واقع ہوجاتی ہے، البتہ اگر شوہر کو تحریری طلاق پر "اکراہ" کی حد تک مجبور کر دیا جائے، اور اس نے زبان سے طلاق کے الفاظ ادا نہ کیے ہو، تو ایسی تحریری طلاق واقع نہیں ہوتی ہے۔
سوال میں ذکر کردہ تفصیل اگر واقعتاً درست ہے کہ آپ کی بہن نے آپ کو طلاق دینے پر مجبور کیا، یعنی اگر آپ اپنی بیوی کو طلاق نہ دیتے، تو آپ کو یقین یا غالب گمان تھا کہ آپ کی بہن خودکشی کر لیتی، تو یہ صورت اکراہ (مجبوری) کی ہے، اور اکراہ کی حالت میں تحریری طلاق واقع نہیں ہوتی ہے، لہذا ایسی صورت میں آپ کی بیوی پر کوئی طلاق واقع نہیں ہوئی ہے۔
البتہ اگر ایسی صورت نہیں تھی، یعنی اگر آپ اپنی بیوی کو طلاق نہ دیتے، تو آپ کو یقین یا غالب گمان تھا کہ آپ کی بہن خود کشی نہیں کرے گی، محض آپ پر بہن کا دباؤ تھا اور اس دباؤ کی وجہ سے آپ نے اپنی بیوی کو طلاق دی ہے، تو ایسی صورت "اکراہ" میں داخل نہیں ہے، لہذا ایسی صورت میں طلاق نامہ میں لکھی گئی تعداد کے مطابق آپ کی بیوی پر تین طلاقیں واقع ہوجائیں گی۔