سوال: میری بیٹی کا نام وانیہ ہے، مجھے پتا چلا ہے کہ یہ نام ٹھیک نہیں ہے، اب ہم نام کس طرح تبدیل کر سکتے ہیں؟

جواب: "وانیہ" نام کے معانی ہیں:  "کمزور عورت، سست عورت اور ہلکی خوش گوار ہوا" اگرچہ آخری معنی کے لحاظ سے یہ نام رکھنے کی گنجائش ہے، لیکن چونکہ اس لفظ میں دیگر نامناسب معانی کا بھی احتمال موجود ہے، لہذا بہتر یہی ہے کہ آپ یہ نام تبدیل کرلیں۔
واضح رہے کہ بچیوں کے نام امہات المؤمنین یا صحابیات رضی اللہ عنہن کے بابرکت ناموں میں سے کسی نام پر رکھنے چاہیے، تاکہ ان بابرکت ہستیوں کا اثر اس بچی پر بھی ظاہر ہو، کیونکہ احادیث مبارکہ کے مطابق انسان کی شخصیت پر نام کا بڑا اثر ہوتا ہے۔
ذیل میں ازواج مطہرات اور بعض صحابیات کے نام ذکر کیے جاتے ہیں، جن میں سے آپ کوئی بھی نام اپنی بچی کے لیے رکھ سکتے ہیں:
خدیجہ، سودہ، عائشہ، حفصہ، زینب، جویریہ، ام حبیبہ، میمونہ، صفیہ، ریحانہ، ماریہ، نفیسہ، لیلی، خولہ، عفراء، آسیہ، آمنہ، فاطمہ،اسماء، امیمہ، امامہ، اثیلہ، برزہ، برکہ، ثمیمہ۔