سوال: ایک شخص جنرل سٹور کی دکان کھولنے کا خواہشمند ہے اپنی اس خواہش کی تکمیل کے لیے اس نے دکان ذاتی پیسوں سے تعمیر کی دکان تیار ہے بس سامان لانے کی دیر ہے، مگر اس کے پاس پیسے نہیں ہیں تو اس نے ایک دوسرے شخص سے اس کے متعلق بات کی، اس شخص نے انہیں تسلی دی اور کہا بھائی کوئی مسئلہ نہیں میں آپ کو پیسے دے دیتا ہوں آپ کو پیسوں کے متعلق فکر مند ہونے کی کوئی ضرورت نہیں، یہ پیسے (مثلاً پانچ لاکھ روپے) رکھ لیجئے سامان منگوائیں اور بس دکان کھولیے لیکن شرط یہ ہے کہ میں منافع میں آپ کے ساتھ شریک ہوں گا جتنا منافع ہوگا ہم دونوں آپس میں برابر تقسیم کریں گے، تو جنرل سٹور والے نے کہا صحیح ہے مگر چونکہ میں نے دکان بنائی ہے جس پر تقریباً ڈھائی تین لاکھ روپے خرچہ کیا ہے تو میں ہر مہینے کا کرایہ (جو بھی آپس میں طے ہو مثلاً پانچ ہزار روپے) بھی لوں گا اس پر پیسے دینے والے شخص نے بولا بالکل کرایہ آپ کو ضرور دوں گا۔
واضح رہے کہ پیسے دینے والے نے صرف پیسے ہی دیئے ہیں باقی دکان سنبھالنا بالکلیہ جنرل سٹور والے کے ذمہ ہے۔ اب دریافت طلب امر یہ کہ:
1. آیا اس طرح کا معاملہ کرنا شرعاً درست ہے یا نہیں؟
2. نفع میں کمی بیشی کا معاملہ باہمی رضا مندی سے کسی بھی وقت طے کرنا درست ہے یا نہیں؟ مثلاً جنرل سٹور والا کہے کہ میں آپ کو کل نفع کا نصف کی بجائے تہائی یا مثلاً چوتھائی دوں گا اگرچہ پہلے میں نصف پر راضی ہوا تھا۔
3. خدانخواستہ اگر نقصان ہوجائے تو یہ نقصان دونوں میں سے کس کو برداشت کرنا پڑے گا یا پھر دونوں برداشت کریں گے؟
4. کیا فریقین میں سے کوئی ایک خود کو نقصان سے بری کر سکتا ہے یا نہیں؟
5. نقصان کی شرح کس پر کتنی عائد ہوگی؟
6. دکان کا کرایہ جنرل سٹور والا لے سکتے ہے یا نہیں؟

جواب: 1: سوال میں ذکر کردہ طریقہ مضاربت کا ہے، مضاربت وہ عقد ہے جس میں ایک فریق کا سرمایہ اور دوسرے فریق کی محنت ہو، اور نفع میں دونوں فریق شریک ہوں۔
2: نفع کا تناسب ابتداء ہی میں باہمی رضامندی سے طے کرنا ضروری ہے، ابتدا میں نفع کا تناسب طے نہ کیا جائے تو اس سے عقد مضاربت فاسد ہوجاتا ہے۔
تاہم ایک خاص تناسب طے ہوجانے کے بعد باہمی رضامندی سے اس تناسب میں تبدیلی کرنا جائز ہے۔
5,4,3: اگر کاروبار میں نقصان مضارب (محنت کرنے والے فریق) کی تعدی یا کوتاہی کی وجہ سے ہو تو مضارب اس کا ذمہ دار ہوگا، لیکن اگر نقصان مضارب کی تعدی کے بغیر ہو تو اولا اس کی تلافی کاروبار میں ہونے والے نفع سے کی جائے گی، اور اگر نقصان كا حجم اس سے بڑا ہو اور منافع سے اس نقصان کی تلافی نہ ہوتی ہو تو وہ نقصان اصل سرمائے میں سے سمجھا جائے گا، اس کی ذمہ داری مضارب پر نہیں ہے، جب تک کہ اس کی تعدی یا کوتاہی ثابت نہ ہو۔
6: اگر رب المال (سرمایہ فراہم کرنے والا فریق) نقصان سے بری ہونے کی شرط لگاتا ہے تو یہ شرط لغو ہے، اس شرط پر نہ تو عمل کیا جائے گا اور نہ ہی اس کی وجہ سے عقدِ مضاربت فاسد ہوگا، بلکہ یہ شرط خود فاسد ہوجائے گی۔
البتہ اگر مضارب تعدی اور کوتاہی نہ ہونے کی صورت میں نقصان سے بری ہونے کی شرط لگاتا ہے تو اس میں کوئی حرج نہیں ہے، کیوں کہ کوتاہی نہ ہونے کی صورت میں مضارب پر ویسے بھی نقصان کی ذمہ داری نہیں ہوتی۔
7: دکان کا کرایہ اگر رب المال کی اجازت سے وصول کرے تو ایک قول کے مطابق اس کی گنجائش ہے۔