سوال: بدھ کے دن حجامہ کرنے کی شرعی حیثیت کیا ہے؟

جواب: واضح رہے کہ قمری مہینے کی سترہ، انیس اور اکیس تاریخ کو حجامہ لگوانا زیادہ فائدہ مند ہے اور دنوں میں سے پیر، منگل اور جمعرات کو حجامہ لگوانا مفید ہے۔

سنن ابن ماجہ میں ہے:
حضرت عبداللہ بن عمر رضی اللہ عنہما فرماتے ہیں کہ انہوں نے (اپنے غلام) نافع سے کہا: نافع! میرے خون میں جوش ہے، لہٰذا کسی پچھنا لگانے والے کو میرے لیے تلاش کرو، اور اگر ہو سکے تو کسی نرم مزاج شخص کو لانا، زیادہ بوڑھا اور کم سن لڑکا نہ ہو، اس لیے کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: ”پچھنا نہار منہ لگانا بہتر ہے، اس میں شفاء اور برکت ہے، اس سے عقل بڑھتی ہے اور قوت حافظہ تیز ہوتی ہے، تو جمعرات کو پچھنا لگواؤ، اللہ تعالیٰ برکت دے گا، البتہ بدھ، جمعہ، ہفتہ اور اتوار کو پچھنا لگوانے سے بچو، اور ان دنوں کا قصد نہ کرو، پھر پیر اور منگل کے دن پچھنا لگواؤ، اس لیے کہ منگل وہ دن ہے، جس میں اللہ تعالیٰ نے ایوب علیہ السلام کو بیماری سے نجات دی، اور بدھ کے دن آپ کو اس بیماری میں مبتلا کیا تھا، چنانچہ جذام (کوڑھ) اور برص (سفید داغ) کی بیماریاں (عام طور سے) بدھ کے دن یا بدھ کی رات میں پیدا ہوتی ہیں“۔
(سنن ابن ماجہ ،حدیث نمبر: 3487)
مسند البزار میں ہے:
حضرت ابوھریرہ رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: "اگر کسی نے بدھ یا ہفتے کے دن حجامہ کرایا اور پھر اس کو سفید داغ کا مرض ہوگیا، تو وہ اس بیماری پر خود کو ملامت کرے"۔
(مسند البزار، حدیث نمبر:7800)
سنن ابی داود میں ہے:
حضرت ابوھریرہ رضی اللہ عنہ سے روایت ہے کہ جناب رسول اللہ ﷺ نے ارشاد فرمایا: ”جو سترہویں، انیسویں اور اکیسویں تاریخ کو پچھنا لگوائے تو اسے ہر بیماری سے شفاء ہو گی“۔
(سنن ابی داؤد،حدیث نمبر: 3861)
خلاصۂ کلام:
قمری مہینے کی سترہ، انیس اور اکیس تاریخ کو حجامہ لگوانا زیادہ مفید ہے اور دنوں میں پیر، منگل اور جمعرات کے دن مفید ہیں، البتہ ضرورت کے وقت حجامہ کسی بھی تاریخ کو اور کسی بھی دن حتی کہ رات کو بھی لگوانا جائز ہے۔