سوال: اگر کوئی شادی شدہ شخص کسی لڑکی کی محبت میں گرفتار ہوکر اس لڑکی کو خوش کرنے کے لئے یہ کہے کہ "تمہارے سوا دنیا کی تمام عورتیں مجھ پر حرام ہیں" تو اس کا اپنی بیوی سے نکاح باقی رہے گا یا نہیں؟
اور وہ اس لڑکی کو خوش کرنے کے لئے فون پر اس طرح کہے کہ "میں اپنی بیوی کو طلاق دوں گا" اور "وہ مجھ پر طلاق ہے" تو کیا نکاح باقی رہا کہ نہیں؟ برائے مہربانی رہنمائی فرمائیں شکریہ۔

جواب: سوال میں تین الگ الگ جملے بیان کر کے ان کا حکم پوچھا گیا ہے، چونکہ سوال میں یہ وضاحت نہیں گئی ہے کہ کونسا جملہ پہلے کہا گیا ہے اور کونسا بعد میں؟ یا یہ جملے الگ الگ مواقع پر کہے گئے ہیں یا ایک ساتھ کہے گئے ہیں؟ اگر ان جملوں کے کہنے کی ترتیب بیان کی جاتی، تو اس ترتیب کا حکم بیان کیا جاتا، لیکن چونکہ یہ وضاحت نہیں گئی ہے، اس لیے ذیل میں الگ الگ صرف ان جملوں کا حکم بیان کرنے پر اکتفا کیا جاتا ہے:
1- واضح رہے کہ طلاق کے سلسلے میں لفظ "حرام" عرفِ عام میں طلاق کے وقوع پذیر ہونے کے اعتبار سے طلاق صریح کا حکم رکھتا ہے، اسی وجہ سے بیوی کے متعلق لفظ "حرام" استعمال کرنے پر بغیر نیت کے بھی طلاقِ بائن واقع ہوجاتی ہے۔
لہذا اگر کوئی شخص کسی اجنبی عورت کو خوش کرنے کے لیے یہ الفاظ کہے: "تمہارے سوا دنیا کی تمام عورتیں مجھ پر حرام ہیں"، تو چونکہ دنیا کی عورتوں میں اس کی بیوی بھی شامل ہے، لہذا مذکورہ جملہ کہتے ہی اس شخص کی بیوی پر ایک طلاق بائن واقع ہو جائے گی اور ان دونوں کا نکاح فورا ختم ہو جائے گا، اس کے بعد اگر وہ دوبارہ میاں بیوی کی طرح رہنا چاہیں، تو عدت کے اندر یا عدت کے بعد باہمی رضامندی سے نئے مہر و نکاح کے ساتھ رہ سکتے ہیں، ایسی صورت میں شوہر کے پاس آئندہ صرف دو طلاقوں کا اختیار ہوگا۔
2- "میں اپنی بیوی کو طلاق دوں گا"، اس جملے سے کوئی طلاق واقع نہیں ہوگی، کیونکہ یہ جملہ طلاق نہیں ہے، بلکہ طلاق کا وعدہ ہے، لہذا صرف اس جملے کے کہنے سے اس شخص کی بیوی پر کوئی طلاق واقع نہیں ہوگی۔
3- اگر کوئی اپنی بیوی کے متعلق کہے: "وہ مجھ پر طلاق ہے"، تو اس جملے سے ایک طلاق رجعی واقع ہو گی اور عدت کے اندر اندر شوہر کو رجوع کا حق حاصل ہوگا، ایسی صورت میں مذکورہ شخص کو آئندہ صرف دو طلاق کا حق حاصل ہوگا۔