سوال: کیا کسی میت کے چالیسویں میں شریک ہوسکتے ہیں، اگر کوئی شریک نہ اور اس کے گھر چالیسویں کا کھانا آجائے تو اس کھانے کا کیا حکم ہے؟

جواب: تیجہ، دسواں، چالیسواں یا میت کے ایصال ثواب کے لیے کسی بھی وقت اور دن کا مخصوص اور لازم کر لینا اور اس میں دعوتوں کا اہتمام و التزام کرنا اور باقاعدہ اس کو دین کا لازمی حصہ بنانا اور ایسا نہ کرنے والوں یا اس میں شرکت نہ کرنے والوں کو طعن و تشنیع کرنا، یہ شریعت میں اضافہ اور بدعت ہے، جس کا ثبوت حضور اکرم صلی اللہ علیہ وسلم، صحابہ کرام، تابعین اور تبع تابعین کے دور میں نہیں ملتا ہے، لہذا ایسے مواقع پر ثواب سمجھ کر ان مجالس میں شرکت کرنا بدعت اور ناجائز ہے، جس سے اجتناب کرنا لازم ہے، تاہم اگر کسی نے ان مجالس میں شرکت نہ کی ہو اور اسے یہ کھانا دے دیا جائے یا ایسا کھانا گھر آجائے تو اسے حرام نہیں کہا جا سکتا ہے۔
اس سلسلہ میں ایک اصول سمجھنے کی ضرورت ہے، وہ یہ کہ مذکورہ مسئلہ میں اصل مسئلہ اس کھانے کے "قبول" کرنے کا ہے کہ اسے بدعت کی ترویج و اشاعت کی بنا پر قبول نہیں کرنا چاہیے، لیکن اگر وہ وصول کرلیا ہے تو اس کے کھانے کا حکم یہ ہے کہ اگر کھانے وغیرہ کے متعلق یہ یقین ہو کہ کھانا دینے والوں کی آمدنی حلال ہے، تو اس کا استعمال جائز ہے۔