سوال: دو بھائیوں نے 40 سال قبل ایک مشترکہ کاروبار کی بنیاد رکھی، کاروبار کی ابتداء بڑے بھائی نے اپنی ذاتی رقم سے کی جبکہ چھوٹے بھائی کا کوئی سرمایہ نہیں تھا، 1998ء میں بڑے بھائی حج پر جاتے ہوئے اپنے بڑے بیٹے کو بھائی کے ساتھ کام پر لگا گئے۔
تقریباً پانچ سال تک بڑے بھائی کا بیٹا اپنے چچا کے ساتھ بلا معاوضہ کام کرتا رہا، بالاخر اپنے چچا کے ساتھ ٪50 فیصد پر پارٹنر کی حیثیت سے باہمی رضامندی کی بنیاد پر کام کرنے لگا جبکہ بڑے بھائی نے کام پر آنا چھوڑ دیا تھا۔
اس تمام عرصہ میں دونوں بھائی اپنی گھریلو ضروریات واخراجات اسی دکان اور کاروبار سے پوری کرتے رہے، پھر اسی دکان سے دونوں بھائیوں کے لیے دو مکان بھی خریدے گئے اور ابھی جائیداد میں ایک گودام، ایک دکان اور دکان کا سامانِ تجارت موجود ہے، دونوں بھائی باہمی رضامندی سے نصف نصف کی بنیاد پر تقسیم چاہتے ہیں۔
اب معلوم یہ کرنا ہے کہ کیا تقسیم میں دکان کی ویلیو کی مارکیٹ قیمت کو بنیاد بنانا ہوگا اور کیا دکان کی گڈول کی الگ حیثیت میں قیمت لگا کر وہ بھی تقسیم شرعی میں معتبر ہوسکتی ہے؟

جواب: پوچھی گئی صورت میں اگر فریقین اپنی رضامندی سے مصالحت کے طور پر کاروبار کو آدھا آدھا تقسیم کرنا چاہتے ہیں تو شرعا اس میں کوئی حرج نہیں ہے۔
جہاں تک گڈول (Goodwill) کی قیمت کا تعلق ہے تو اس کا حکم یہ ہے کہ گڈول بذات خود کوئی ایسا مال نہیں ہے کہ شرعا اس کی خرید و فروخت کی جاسکے، بلکہ یہ محض حیثیت عرفی اور کاروباری شہرت کی نمائندگی ہے، اس لئے اگر اس کی قانونی طور پر کوئی رجسٹریشن وغیرہ نہیں کی گئی تو اس کی مستقل طور پر خرید و فروخت شرعا درست نہیں ہوگی۔
اور اگر اس کاروباری نام کی قانونی طور پر باقاعدہ رجسٹریشن کروالی جائے تو قانونا یہ ایک ثابت شدہ حق بن جائے گا، ایسی صورت میں شرعا بھی اس حق کا اعتبار ہوگا، لہذا ایسی صورت میں اس کی خرید وفروخت کی بھی گنجائش ہوگی۔
نیز دوکان اور کاروباری اثاثہ جات کی قیمت میں تبعاََ گڈول (Goodwill) کی حیثیت کا بھی اعتبار کیا جا سکتا ہے۔
لہذا پوچھی گئی صورت میں کاروبار تقسیم کرتے وقت گڈول (Goodwill) کی الگ سے قیمت لگا کر تقسیم کرنے کی بجائے مارکیٹ عرف کے مطابق اس کی قیمت کا اعتبار کیا جاسکتا ہے، اس طرح کہ جس کے حصے میں گڈول آئے، اس کے حصہ کی دوکان یا سامان کی قیمت گڈول کی وجہ سے زیادہ شمار کی جاسکتی ہے۔