سوال: شادی کے بعد مرد پر بیوی کا حق زیادہ ہوتا ہے یا اس کے والدین اور دیگر رشتہ داروں کا حق زیادہ ہوتا ہے؟

جواب: شریعت نے انسان پر اس کے مختلف رشتے داروں کے لیے مختلف حقوق مقرر کیے ہیں، جن میں قدرت نے زبردست توازن اور اعتدال رکھا ہے، اور پھر ان رشتوں کو اسی اعتدال اور توازن کے ساتھ نبھانا ضروری قرار دیا ہے، چنانچہ اللہ تعالی نے والدین اور بیوی میں سے ہر ایک کو الگ الگ رتبہ اور حیثیت اس طرح دی ہے کہ ان کے باہمی حقوق کو ادا کرنے میں آپس میں کوئی ٹکراؤ یا تصادم (clash) نہیں ہوتا ہے۔ والدین کے اپنے حقوق ہیں اور بیوی کے اپنے حقوق ہیں۔ والدین کی خدمت کرنے، انہیں تکلیف سے بچانے اور ان کے لیے دعائیں کرنے کا حکم دیا گیا ہے، جبکہ بیوی کی ضروریات پوری کرنے، اسے پریشانی سے بچانے اور اس کا بھی ہر طرح سے خیال رکھنے کا حکم دیا گیا ہے، لہذا مرد کو چاہیے کہ وہ حسنِ اخلاق اور ذہانت سے بیوی، والدین اور دیگر تمام رشتہ داروں کے حقوق اس طرح ادا کرے کہ ان میں کسی قسم کے ٹکراؤ، تنازع یا تصادم کی کیفیت پیدا نہ ہو، اور اس بات کی حد درجہ کوشش کرے کہ کسی ایک کی وجہ سے دوسرے کا حق ضائع نہ ہو۔