سوال: نماز میں سورہ فاتحہ کا کتنا حصہ رہ جانے سے سجدہ سہو واجب ہو جاتا ہے اور سجدہ سہو نہ کرنے کی صورت میں نماز نہیں ہوتی؟

جواب: ‏نماز کی جن رکعتوں میں سورہ فاتحہ پڑھنا واجب ہے، یعنی فرض نماز کی پہلی دورکعتیں جبکہ وتر، سنت اور ‏نفل کی تمام رکعتوں میں مكمل يا اكثر سورہ فاتحہ کے رہ جانے سے سجدہ سہو لازم ہوگا، اقل سورہ فاتحہ ‏کے رہ جانے سے سجدہ سہو لازم نہیں ہوگا، اور سورہ فاتحہ کی اکثر مقدار چار آیتیں ہیں، جبکہ اقل مقدار تین آیتیں ‏ہیں۔ تاہم اگر اقل مقدار یا اس سے کم چھوٹنے کی صورت میں بھی سجدہ سہو کرلیا جائے تو یہ احتیاط کے مطابق ہے، ‏البتہ فرض کی آخری دو رکعتوں میں چونکہ سورہ فاتحہ پڑھنا لازم نہیں ہے، اس لئے فرض کی آخری دو رکعتوں میں پوری سورہ فاتحہ یا اس کا ‏کوئی حصہ چھوڑ دینے سے سجدہ سہو لازم نہیں ہوتا۔
واضح رہے کہ سجدہ سہو واجب ہونے کی صورت میں اگر سجدہ سہو نہ کیا جائے ‏تو وقت کے اندر اندر اس نماز کا لوٹانا واجب ہے، جبکہ وقت گذرنے کے بعد اس کا لوٹانا مستحب ہے، واجب نہیں ہے۔