سوال: رسول اللہ صلی اللہ علیہ وسلم نے فرمایا: تین آدمی ایسے ہیں جن پر اللہ تعالی نے جنت کو حرام کر دیا ہے: دائمی شرابی، ماں باپ کا نافرمان اور "دیوث" جو اپنے بیوی بچوں میں بے حیائی برداشت کرتا ہے۔ (مسند احمد) کیا یہ حدیث صحیح ہے؟

جواب: سوال میں مذکور حدیث "صحیح" ہے، لہذا اس حدیث کو بیان کیا جا سکتا ہے، ذیل میں اس حدیث کا ترجمہ اور اس کى اسنادى حیثیت کو ذکر کیا جاتا ہے:
ترجمہ:
حضرت عبد اللہ بن عمر رضی اللہ عنہما سے مروى ہے، وہ فرماتے ہیں کہ میں نے رسول اللہ صلى اللہ علیہ وسلم کو یہ فرماتے ہوئے سنا: "تین لوگ ایسے ہیں جن پر اللہ تعالى نے جنت کو حرام قرار دیا ہے: شراب کا عادى، ماں باپ کا نافرمان اور دیوث جو اپنے گھر والوں کى خباثت (بے حیائى وبے پردگى) پر راضى رہے"۔
(مسند احمد: حدیث نمبر: 5372)
حدیث کى اسنادى حیثیت:
اس حدیث کو حافظ منذرى رحمہ اللہ (م 656ھ) نے اپنى کتاب "الترغیب والترھیب" ج 3 ص 178، رقم الحدیث (3567) میں نقل کر کے فرمایا ہے: "اس حدیث کو امام احمد، امام نسائى، امام بزار اور امام حاکم رحمہم اللہ تعالیٰ نے اپنی کتب احادیث میں نقل کیا ہے، یہاں الفاظ مسند احمد سے لیے گئے ہیں، امام حاکم رحمہ اللہ نے اس کى سند کو "صحیح" قرار دیا ہے"۔