عنوان: غیر ماثور ومنقول درود شریف کی تحقیق اور حکم

سوال: محترم مفتی صاحب! درجِ ذیل درود شریف کی تصدیق فرمادیں، نیز اس درود شریف کی نسبت سے ایک بادشاہ کا قصہ اور اس کے پڑھنے والے کو 10 لاکھ نیکیوں کا ثواب ' کیا یہ باتیں مستند ہیں؟ درود شریف یہ ہے:" اللھم صل علی سیدنا ونبینا محمد وآلہ ما اختلف الملوان وتعاقب العصران وکر الجدیدان واستقبل الفرقدان، وبلغ روحه وأرواح أهل بيته مني التحية والسلام"۔

جواب: واضح رہے کہ درود شریف پڑھنے کے سلسلہ میں یہ بات ضروری نہیں کہ ہر درود شریف کے تمام کلمات آنحضرت ﷺ سے بعینہ منقول ہوں، بلکہ صرف درست مفہوم پر مشتمل ہونے کی وجہ سے اس درود کا پڑھنا فائدہ سے خالی نہیں ہے۔ لہذا سوال میں پوچھا گیا درود شریف معنی کے اعتبار سے بالکل درست ہے، اس بناء پر اگر کوئی شخص مذکورہ درود پڑھنے کا ذوق و شوق رکھتا ہو تو وہ پڑھ سکتا ہے، البتہ سوال میں پوچھا گیا واقعہ کسی مستند سند کے ساتھ کتب میں واقع نہیں ہوا ہے، صرف صاحبِ"روح البیان" امام ابو الفداء إسماعيل حقي استنبولی(المتوفی: 1127ھ) نے اپنی تفسیر میں بغیر کسی سند کے بصیغہ مجہول واقعہ کو ذکر کیا ہے، لہذا جب تک کسی معتبر سند سے اس قصّہ اور واقعہ کی تصدیق نہ مل جائے، اس وقت تک اس قصہ کو بیان کرنے سے احتراز کیا جائے۔
باقی تفسیر روح البیان میں ذکر کردہ واقعہ کا ترجمہ درجِ ذیل ہے:
"ایک شخص سلطان محمود غزنوی کے پاس حاضر ہوا، اور عرض کیا کہ میں ایک مدت سے نبیﷺ کی خواب میں زیارت کا مشتاق تھا، تاکہ ان کو اپنے غم وکرب کی کیفیت سے آگاہ کروں، مگر یہ موقعہ نصیب نہیں ہوا، لیکن گزشتہ رات میری قسمتی چمک ل اٹھی، میں خواب میں نبیﷺ کی زیارت سے شرف اندوز ہوا، میں نے آپ کی خدمت میں عرض کیا کہ اے اللہ کے رسول! میں دس ہزار درھم کا مقروض ہوں، ادائیگی سے عاجز ہوں، اب اندیشہ رہتا ہے کہ کسی بھی وقت اس دنیا سے رخصت ہوجاؤں اور میری گردن پر قرض کا یہ بار باقی رہے۔ اس بات کو سننے کے بعد نبیﷺ نےفرمایا: "محمود غزنوی کے پاس جاؤ، اور اس سےمکمل رقم وصول کرلو۔
وہ شخص کہنے لگا کہ اے اللہ کے نبی! وہ تو ایسے میری بات کو قبول نہیں کریں گے تو آپ ﷺ نے فرمایا: ان سے کہنا کہ تم مجھ پر رات کے ابتدائی اور انتہائی پہر(وقت) تیس تیس ہزار مرتبہ درود پاک بھیجتے ہو (جو کسی انسان کے علم میں نہیں ہے)۔
وہ شخص سلطان محمود غزنویؒ کی خدمت میں حاضر ہوا، اور رات والا خواب سنایا، اس خواب کا سننا تھا کہ سلطان محمود کی آنکھیں بھر آئیں، اور مکمل رقم سمیت ایک ہزار اضافی عنایت کیے۔ دربار میں موجود حاضرین کافی حیران ہوئے اور عرض کیا کہ اے سلطان ِ وقت! ہم تو ان دونوں موقعوں پر آپ کے ہمراہ ہوتے ہیں، ہم نے تو کبھی اس معمول کو اختیار کرتے نہیں دیکھا اور خود ساٹھ ہزار بار درود شریف پڑھنا یہ تو شاید ہی کسی انسان کی قدرت میں ہو۔ سلطان نے فرمایا: میں نے علماء سے سنا ہے کہ ایک درود شریف ایسا ہے جس کا ایک دفعہ پڑھنا ایک ہزار بار درود شریف پڑھنے کے مترادف ہے، اور یہ درود شریف میں رات کے ابتدائی اور انتہائی پہر (وقت) تین تین دفعہ پابندی سے پڑھتا ہوں۔ یہ شخص اپنے خواب میں سچا ہے۔ وہ درود شریف یہ ہے: (ترجمہ) "اے اللہ! ہمارے نبی حضرت محمد ﷺ پر رحمتوں کا نزول فرما، جتنا کہ زمانے کے رنگ بدلتے ہیں، زمانہ کی گردش کا تسلسل ہے، نئے دن آتے ہیں اور ستارے اپنی جگہ پر ہیں، اور ان کی روح اور اہل بیت کی روحوں تک ہماری طرف سے سلام پہنچا۔ اور ان پر کثرت سے برکت اور سلامتی نازل فرما۔" (روح البیان ، تفسیر سورة الأحزاب، آیت نمبر:56، 234/7، الناشر: دار الفكر – بيروت)