سوال: کچھ بزرگوں کا ایک قبرستان پر سے گزر ہوا تو یکایک قبرستان میں ایک قبر شق ہوگئی اور اس کے اندر سے ایک آدمی نکلا، اس کا سر گدھے کی طرح تھا اور بدن آدمی کی طرح تھا، وہ تین مرتبہ گدھے کی بولی بولا، پھر اس قبر میں بند ہو گیا۔ ان بزرگوں نے اس بستی میں اس قبر والے کا گھر تلاش کیا اور اس کی بیوی سے دریافت کیا کہ یہ کیا ماجرا ہے؟ اس کا پورا حال پوچھا تو اس نے بتایا کہ یہ آدمی شراب پیتا تھا اور اس کی ماں اسے کہتی تھی کہ بیٹا خدا سے ڈر اور اس حرام چیز کو استعمال نہ کر تو جواب میں وہ ماں کو کہا کرتا تھا کہ تو گدھے کی طرح بولتی اور چلاتی رہتی ہے وغیرہ،ایک دن وہ عصر کے بعد مرگیا، اسی وجہ سے عصر کے بعد اس کی قبر پھٹ جاتی ہے اور وہ قبر سے نکل کر تین مرتبہ گدھے کی آواز نکالتا ہے اور پھر غائب ہو جاتا ہے۔ یہ واقعہ الترغیب والترہیب یا نزہۃ المجالس میں موجود ہے کیا یہ واقعہ مستند ہے؟

جواب: جی ہاں! سوال میں مذکور یہ واقعہ علامہ عبد الرحمن صفوریؒ (م 894ھ) کی کتاب "نزھة المجالس ومنتخب النفائس" ج 1 ص 196، ط: المطبعة الكاستلية-مصر، میں "الترغیب والترہیب" کے حوالے سے بغیر کسی سند کے مذکور ہے، البتہ چونکہ یہ محض ایک عبرت ناک واقعہ ہے جس کا واقع ہونا کوئی بعید بھی نہیں ہے، لہذا ممکن ہے کہ ایسا واقعہ کسی زمانے میں رونما ہوا ہو، اس لیے اس واقعے کو بطورِ مثال وعبرت کے بیان کرنے میں کوئی حرج نہیں ہے۔ تاہم چونکہ "نزھة المجالس ومنتخب النفائس" ایسی کتاب ہے، جس میں بہت سی من گھڑت احادیث اور اسرائیلی روایات ہیں، جس کی وجہ سے حدیث کے معاملے میں اس کتاب کو اہل علم نے غیر معتبر قرار دیا ہے۔