سوال: ہماری مسجد کے امام صاحب صاحبِ ترتیب تھے ان کی وتر کی نماز فوت ہوگئی تھی، وتر کی قضاء کیے بغیر انہوں نے بھولے سے فجر کی نماز کی امامت کرلی، دوسری رکعت کے قعدہ اخیرہ میں ان کو یاد آیا کہ میرے وتر باقی ہیں تو ایسی صورت میں ان کی اور مقتدیوں کی نماز کا کیا حکم ہے؟

جواب: واضح رہے کہ اگر کسی صاحب ترتیب شخص کے ذمہ وتر کی قضا باقی ہو اور اسے فجر کی نماز کے دوران یاد جائے تو اس کے ذمہ ترتیب کی رعایت لازم ہے، لہذا پہلے وہ وتر کی نماز قضا کرے گا اور اس کے بعد فجر کی نماز دوبارہ پڑھے گا بشرطیکہ وقت میں وسعت ہو۔
سوال میں ذکر کردہ صورت میں چونکہ امام کو قعدہ اخیرہ میں دوران نماز وتر کی قضا یاد آگئی تھی، لہذا اگر وقت میں اس قدر وسعت تھی کہ امام نماز توڑ کر پہلے وتر کی قضا کرکے پھر دوبارہ فجر کی نماز پڑھا سکتا تھا تو ایسی صورت میں امام اور مقتدی حضرات کی نماز نہیں ہوئی ہے، جس کا لوٹانا سب کے ذمہ لازم ہے، اور اگر وقت میں اس قدر وسعت نہیں تھی تو سب کی نماز ادا ہوگئی ہے۔