سوال: ہمارے محلہ میں ایک مسجد ہے، جس میں جمعہ کی نماز، خطبہ، بیان اور رمضان میں راتوں میں بیان سب باہر کے مائک پر ہوتا ہے، جس سے آنے جانے والے لوگ، دوکان دار ،گھر میں مریض، بچے سب کو تکلیف ہوتی ہے، جبکہ باہر کے لوگ بے اعتنائی برتتے ہیں اور امام کو اس کا علم ہے اس کے باوجود مسجد کے اندرون کا مائیک کے ساتھ باہر کا مائک بھی استعمال ہوتا ہے، ایسے میں امام اور انتظامیہ کی کیا ذمہ داری ہے؟

جواب: واضح رہے کہ مسجد کی حدود سے باہر کے لاؤڈ اسپیکر کا استعمال بوقت ضرورت اور بقدرِ ضرورت کرنا چاہیے۔ چونکہ جمعہ کی نماز اور عربی خطبہ میں مسجد کے حدود میں موجود نمازیوں تک امام کی آواز پہنچانا مقصود ہوتا ہے، لہذا امام کی آواز اس قدر ہونی چاہیے کہ مسجد کے حدود میں موجود نمازیوں تک بسہولت پہنچ سکے۔ اس کے لیے مسجد کے حدود کے باہر والے لاؤڈ اسپیکر بلا ضرورت استعمال کرنا درست نہیں ہے، کیونکہ عموماً لوگ قرآن مجید کی تلاوت اور عربی خطبہ کی طرف توجہ نہیں دیتے اور اس سے قرآن مجید کی بے حرمتی ہوتی ہے، جس کا وبال باہر کے لاؤڈ اسپیکر کھولنے والوں پر ہوگا۔
البتہ جمعہ کا بیان چونکہ اہل محلہ کو بھی سنانا مقصود ہوتا ہے، تاکہ ہفتے میں ایک مرتبہ لوگوں تک دین کی باتیں پہنچ سکیں، لہذا اس کے لیے مسجد کے حدود کے باہر کے لاؤڈ اسپیکر استعمال کرنے کی اجازت ہے، بشرطیکہ اس سے اہل محلہ کو اذیت نہ ہوتی ہو یا بیماروں کے آرام میں خلل واقع نہ ہوتا ہو۔
لیکن رمضان المبارک کی راتوں میں باہر کے لاؤڈ اسپیکر کے ذریعے بیانات کرنا جس سے اہل محلہ کے مریضوں کو پریشانی ہوتی ہو یا لوگوں کی نیند میں خلل آتا ہو، ہرگز جائز نہیں ہے، لہذا امام مسجد اور انتظامیہ کے لیے اس عمل سے بچنا ضروری ہے۔