سوال: کیا فرماتے ہیں مفتیان کرام اس مسئلہ کے بارے میں کہ دو بیٹوں کو اپنی مرحوم والدہ کی میراث میں سے ایک گھر ملا، ان میں سے ایک بیٹے (عبدالرحمن) کا انتقال ہو گیا ہے، ان کی کوئی اولاد نہیں ہے، ورثاء میں صرف ایک بیوی اور ایک بھائی (محمد عثمان) ہے، جبکہ مرحوم کے والدین کا پہلے ہی انتقال ہو گیا تھا، اور ان کی کوئی بہن بھی نہیں ہے، اس مکان اور مرحوم عبدالرحمن کی چیزوں کی تقسیم کرنا چاہتے ہیں، براہ کرم شرعی تقسیم فرمادیں۔
نیز یہ بھی بتادیں کہ مرحوم عبدالرحمن کی بیوی کی چیزیں (جہیز، فرنیچر وغیرہ) بھی مرحوم عبدالرحمن کی میراث میں تقسیم ہوں گی یا وہ عبدالرحمن کی بیوی کی ہی شمار کی جائیں گی؟

جواب: پوچھی گئی صورت میں آدھا مکان مرحوم عبدالرحمن کی ملکیت تھا، لہذا اب اس کے انتقال کے بعد آدھا مکان یا اس کی قیمت مرحوم عبدالرحمن کے ورثاء میں تقسیم کی جائے گی، جبکہ بقیہ آدھے مکان یا اس کی قیمت کا تنہا مالک محمد عثمان ہوگا۔
واضح رہے کہ وہ تمام چیزیں جو عبدالرحمن کی ملکیت میں تھیں، اور وہ ان چیزوں میں مالکانہ تصرف کا اہل تھا، وہ سب چیزیں مرحوم کے ترکہ میں شامل ہو کر میراث میں تقسیم ہونگی، چاہے وہ نقدی کی شکل میں ہوں، بینک اکاؤنٹ ہوں یا گھریلو اشیاء ہوں، البتہ وہ چیزیں جو بیوہ کی ملکیت ہیں، وہ مرحوم عبدالرحمن کی میراث میں تقسیم نہیں ہوں گی، بلکہ ان چیزوں کی مالکہ مرحوم کی بیوہ ہی ہونگی۔
مرحوم کی تجھیز وتکفین، قرض کی ادائیگی اور اگر کوئی جائز وصیت کی ہو تو ایک تہائی میں وصیت نافذ کرنے کے بعد کل جائیداد منقولہ وغیر منقولہ کو چار (4) حصوں میں تقسیم کیا جائے گا، جس میں سے بیوہ کو ایک (1) اور بھائی محمد عثمان کو تین (3) حصے ملیں گے۔
اگر فیصد کے اعتبار سے تقسیم کریں تو بیوہ کو %25 فیصد اور بھائی کو %75 فیصد حصہ ملے گا۔