سوال: میری بہن کی شادی ایک جگہ ہوئی تھی جس سے ان کی دو بیٹیاں پیدا ہوئیں اور تین سال بعد پھر میرے بہنوئی کا انتقال ہو گیا تھا۔ ان کے انتقال کے بعد میری بہن دو سال اپنے سسرال میں رہی، اس کے بعد وہ اپنی بیٹیوں کے ساتھ ہمارے گھر یعنی اپنے والد کے گھر آگئیں۔ اب تقریباً چودہ سال سے وہ اپنے والد اور بھائیوں کے ساتھ رہ رہی ہے۔
اس دوران میرے بہنوئی کے گھر والوں نے مالی طور پر کوئی خاص مدد نہیں کی۔ چند مہینے انہوں نے تین تین ہزار روپے دیے، جو کہ کسی کام کے نہیں تھے، وہ بھی صرف کچھ ہی مہینوں کے لیے دیے گئے۔ میرے بہنوئی کے والد کا انتقال ان کی زندگی میں ہی ہو گیا تھا۔ زمین ان کی والدہ کے نام پر ہے جو اب وقتاً فوقتاً بیچ رہی ہیں اور اپنے دوسرے دونوں بیٹوں اور دونوں بیٹیوں کو پیسے دے رہی ہیں، لیکن جب ہم کچھ کہتے ہیں تو وہ کہتی ہیں کہ "ان کو بھی ملے گا"۔
اب سولہ سال گزر چکے ہیں، لیکن میری بہن کی ساس یا جیٹھ وغیرہ کسی قسم کا تعاون نہیں کرتے۔ جو زمین ہے، وہ بھی بیچ رہے ہیں لیکن میری بھانجیوں کو کوئی حصہ نہیں دے رہے۔ ان سولہ سالوں میں ان لوگوں نے زیادہ سے زیادہ تیس سے پچاس ہزار روپے دیے ہوں گے۔ جبکہ زمین اچھی مالیت کی ہے۔
اب میری بھانجیاں کالج میں پڑھتی ہیں اور ہر مہینے پندرہ سے بیس ہزار روپے ان کا خرچ ہوتا ہے، جو ان کے نانا اور ماموں برداشت کرتے ہیں۔ پھر ان بچیوں کی شادی بھی کرنی ہے۔
مہربانی فرما کر رہنمائی فرمائیں کہ اب کیا کیا جائے؟
تنقیح: جو زمین جو آپ کے بہنوئی کی والدہ کے نام ہے، محض کاغذی طور پر ان کے نام ہے یا ان کے شوہر نے اپنی زندگی میں اس زمین کو باقاعدہ قبضہ و تصرف کے ساتھ ان کے نام ہبہ (گفٹ) کر دیا تھا؟ اس کی وضاحت فرمائیں تاکہ مسئلے کا شرعی حکم واضح کیا جا سکے۔
جواب تنقیح: میرے بہنوئی کے والد نے اپنی بیوی کو یعنی میری بہن کی ساس کو اپنی زندگی میں زمین دے دی تھی اور میرے بہنوئی کی والدہ کی اپنی زمین بھی ہے جو ان کو اپنے بھائیوں کی طرف سے ملی ہے اور ان کو وہ وقتاً فوقتاً بیچتی ہیں اور اپنے دوسرے بیٹوں اور بیٹیوں کو دیتی ہیں۔

جواب: 1) واضح رہے کہ اگر وہ زمین آپ کی بہن کے سسر نے اپنی بیوی کو ملکیتاً اور مکمل قبضہ اور تصرف کے ساتھ دی تھی تو وہ شرعاً ساس کی ذاتی ملکیت شمار ہوگی، اس زمین میں آپ کی بہن یا ان کی بیٹیوں کا کوئی شرعی حق یا حصہ نہیں ہوگا اور نہ ہی اس زمین میں آپ کی بہن کے سسر کی میراث جاری ہوگی۔
اسی طرح جو زمینیں آپ کی بہن کی ساس کو ان کے بھائیوں نے دی ہیں، وہ بھی ان کی ذاتی ملکیت ہیں، لہٰذا ان میں بھی آپ کی بہن یا بھانجیوں کا کوئی شرعی حق نہیں بنتا۔
2) نفقہ سے متعلق تفصیل یہ ہے کہ اگر آپ کی بھانجیوں کو میراث میں اتنا حصہ ملتا ہے، جس سے وہ اپنا خرچہ برداشت کرسکتی ہیں تو وہ اپنا خرچہ خود برداشت کریں گی، اور اگر وہ اپنا خرچہ برداشت نہیں کرسکتیں اور حلال طریقے سے روزی کمانے سے بھی عاجز ہیں تو ایسی صورت میں ان کے خرچے کا ذمہ ایک تہائی (1/3) ماں پر اور (2/3) چچاؤں پر لازم ہوگا۔
نیز واضح رہے ک بالغ لڑکی کے خرچے کی ذمّہ داری ماں اور چچا پر اس وقت لازم ہے، جب اہل قرابت، رشتہ داروں یا کوئی اور ان کا خرچہ برداشت کرنے کے لیے تیار نہ ہو، اگر کوئی ان کے خرچ کی ذمّہ داری لے لیتا ہے تو پھر ماں اور چچا پر ان کا خرچ لازم نہیں ہے۔
3) مرحومین (آپ کی بہن کے سسر اور شوہر) کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد کل جائیداد منقولہ اور غیر منقولہ کو چار ہزار چھ سو آٹھ (4608) حصوں میں تقسیم کیا جائے گا، جس میں سے آپ کے بہنوئی کی والدہ کو سات سو چوالیس (744) حصے، آپ کے بہنوئی کے دونوں بھائیوں میں سے ہر ایک بھائی کو ایک ہزار بائیس (1022) حصے، آپ کے بہنوئی کی دونوں بہنوں میں سے ہر ایک کو پانچ سو گیارہ (511)حصے، آپ کی بہن کو ایک سو چھبّیس (126) حصے اور آپکی دونوں بھانجیوں میں سے ہر ایک کو تین سو چھتّیس (336) حصے ملیں گے۔
اگر فیصد کے اعتبار سے تقسیم کریں تو آپ کے بہنوئی کی والدہ کو %16.14 فیصد، ان کے دونوں بھائیوں میں سے ہر ایک بھائی کو %22.17 فیصد، ان کی دونوں بہنوں میں سے ہر ایک کو %11.08 فیصد، آپ کی بہن کو %2.73 فیصد اور آپ کی دونوں بھانجیوں میں سے ہر ایک کو %7.29 فیصد حصہ ملے گا۔