سوال: ایک شخص نے شفعہ کا دعوی کیا ہے، لیکن اس کے پاس پیسے نہیں ہیں، مجھے پیسوں کی ضرورت ہے، جبکہ وہ شخص نہ خود لے سکتا ہے اور نہ شفعع سے دستبردار ہوتا ہے، بلکہ کہتا ہے کہ میرے لئے انتظار کرو، پوچھنا یہ ہے کہ شریعت میں انتظار کی حد کتنی ہے؟

جواب: واضح رہے کہ شفعہ کا دعوی کرنے کے بعد شفیع کو چاہیے کہ وہ قاضی کے ہاں شفعہ کا دعوی دائر کرکے اس گھر کو مشتری (خریدار) سے اپنی ملکیت میں لے لے، اگر دعوی کرنے کے بعد شفیع قاضی کے ہاں دعوی کرنے میں بلا عذر تاخیر کرے گا تو ایک ماہ کا عرصہ گزرنے پر اس کا حق شفعہ ساقط ہوجائے گا، البتہ دعوی کرنے کے بعد اگر کوئی عذر ہو (مثلاً: بیماری، قید یا سفر وغیرہ) اور اسے اس معاملے میں کوئی معتبر شخص بھی وکالت کے لیے نہ ملتا ہو تو ایک ماہ کا عرصہ گزرنے کے باوجود اس کا حق شفعہ باقی رہے گا۔
سوال میں ذکر کرده صورت میں چونکہ گھر کی خریداری کے لیے رقم نہ ہونا کوئی شرعی عذر نہیں ہے، لہذا شفعہ کا دعوی کرنے کے وقت سے ایک ماہ کا  عرصہ گزرنے پر مذکورہ شخص کا حق شفعہ ساقط ہوجائے گا۔