سوال: اگر کوئی مسلمان معاذ اللہ دین اسلام چھوڑ کر کوئی اور مذہب قبول کر لے، یعنی مرتد ہو جائے، لیکن اعلانیہ طور پر مرتد نہ ہوا ہو، یعنی اللہ کے سوا کسی کے علم میں بھی نہ ہو کہ یہ دین اسلام چھوڑ کر مرتد ہو چکا ہے، پھر اللہ تعالیٰ اس کو توبہ کی توفیق عطا کر دیں تو کیا اس شخص کو توبہ کے لیے کسی مفتی صاحب کو اپنے ارتداد کا بتانا چاہیے یا پھر کسی کو بتائے بغیر توبہ اور تجدید ایمان کرنے سے وہ دائرہ اسلام میں داخل ہو جائے گا؟
مفتی صاحب! میں نے یہ جملہ کہا تھا کہ "اللہ ایک نہیں ہے"، مجھے اللہ نے توبہ کی توفیق دی اور میں نے درود شریف پڑھ کر کہا کہ اے اللہ! میں نے جو یہ جملہ کہا کہ اللہ ایک نہیں ہے، میں اس جملے سے دل سے نفرت کرتی ہوں اور آپ کی بارگاہ میں اس جملے سے دل سے توبہ کرتی ہوں اور وعدہ کرتی ہوں کہ آئندہ کبھی ایسا جملہ نہیں کہوں گی، میں پورا یقین رکھتی ہوں کہ آپ ایک ہیں، آپ کا کوئی شریک نہیں، آپ اکیلے ہیں اور صرف آپ ہی عبادت کے لائق ہیں، میں آپ کے اور حضرت محمد ﷺ کے بتائے ہوئے تمام احکامات کو دل سے مانتی ہوں اور ہر قسم کے کفر و شرک سے توبہ کرتی ہوں، میرا دل دین اسلام پر بالکل مطمئن ہے، پھر درود شریف پڑھ کہ آمین کہہ کہ میں نے کلمہ شہادت اور ایمان مفصل پڑھی تو مفتی صاحب! کیا ایسا کرنے سے میں دائرہ اسلام میں داخل ہوگئی ہوں؟

جواب: اگر کوئی شخص دل سے اللہ تعالیٰ کی توحید کا قائل ہو جائے اور حضرت محمد ﷺ کو اللہ کا سچا اور آخری رسول مان لے اور زبان سے بھی اس کا اقرار کر لے، اسی طرح اللہ تعالی کی کتابوں، فرشتوں، رسولوں اور آخرت کے دن، ہر اچھی بری تقدیر اور روز قیامت پر ایمان کا اعتراف کر لے تو وہ شخص شرعا مسلمان شمار ہوگا۔ اس کے ساتھ جس سابقہ دین یا عقائد کو چھوڑ کر وہ اسلام میں داخل ہوا ہو، اس دین اور کفریہ عقائد سے براءت کا اظہار کرنا بھی ضروری ہوگا۔
تجدید ایمان پر کسی کو گواہ بنانا ضروری نہیں ہے، البتہ اگر کلمہ کفر یا کفریہ عمل لوگوں کے سامنے کیا ہو تو اس صورت میں ان لوگوں کے سامنے تجدید ایمان کا اظہار کر دینا چاہیے تاکہ کسی قسم کی بدگمانی نہ رہے اور اس پر مسلمانوں والے دنیوی احکام (مثلاً: مسلمان عورت یا مرد سے نکاح، مرنے کی صورت میں مسنون غسل، نماز جنازہ اور مسلمانوں کے قبرستان میں تدفین وغیرہ) جاری ہوسکیں۔
سوال میں پوچھی گئی صورت میں چونکہ آپ نے کلمہ کفر تنہائی میں کہا تھا اور اب آپ اپنے سابقہ کفریہ عقائد سے توبہ تائب ہو کر ان سے براءت کا اظہار کر چکی ہیں اور زبان سے کلمہ شہادت پڑھ لیا ہے اور اسلام کے بنیادی عقائد کا اعتراف بھی کرلیا ہے، لہذا آپ دائرہ اسلام میں داخل ہوچکی ہیں، آپ کو تجدید ایمان پر گواہ بنانے کی ضرورت نہیں ہے، اور اگر آپ شادی شدہ ہیں تو احتیاطاً تجدید نکاح بھی کرلیں۔