سوال: 1) ہمارے والد صاحب کا انتقال ہوگیا ہے، ورثاء میں ایک بیوہ، ایک بیٹا اور پانچ بیٹیاں ہیں، براہ کرم ورثاء میں جائیداد کی تقسیم کا تناسب بتادیں۔
2) ہمارے والد صاحب کی آفس سے کچھ اماؤنٹ انتقال کے بعد ملی تھی، اس سے بھائی نے زمین خرید لی ہے، معلوم یہ کرنا ہے کہ کیا یہ زمین بھی ورثاء میں تقسیم ہوگی؟
3) اسی طرح والد صاحب کی متروکہ زمینوں سے آنے والے کرائے سے مزید زمینیں خریدی ہیں، کیا یہ بھی والد کا ترکہ شمار ہوں گی؟

جواب: 1)مرحوم کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد مرحوم کی جائیداد منقولہ اور غیر منقولہ آٹھ (8) حصوں میں تقسیم ہوگی، جس میں سے بیوہ کو ایک (1)، بیٹے کو دو (2) اور پانچوں بیٹیوں میں سے ہر ایک بیٹی کو ایک (1) حصہ ملے گا۔
فیصد کے اعتبار سے بیوہ کو %12.5 فیصد، بیٹے کو پچیس %25 فیصد اور پانچوں بیٹیوں میں سے ہر ایک بیٹی کو %12.5 فیصد حصہ ملے گا۔
2) آفس سے ملی ہوئی اماؤنٹ سے خریدی گئی زمین بھی والد صاحب کے ورثاء میں ان کے شرعی حصص کے مطابق تقسیم ہوگی۔
3) والد صاحب کی متروکہ زمین کے کرائے سے جو دوسری زمینیں خریدی گئی ہیں، وہ سب والد صاحب کا ترکہ شمار ہوں گی۔