سوال: مرحوم محمد ادریس (غیر شادی شدہ) کے ورثاء میں چار بہنیں، 9 بھتیجے اور 10 بھتیجیاں ہیں، جبکہ اس کے چار بڑے بھائی اس سے پہلے وفات پا چکے ہیں، اور متروکہ سامان میں ایک مکان اور کاروبار ہے۔
مرحوم کی جائیداد کی تقسیم سے متعلق چند سوالات کے جوابات مطلوب ہیں:
۱) جائیداد کی تقسیم کس نسبت سے ہوگی؟
۲) کیا صرف بہنیں وارث ہوں گی یا فوت شدگان بھائیوں کی اولاد بھی حصہ دار ہوگی؟
۳) اگر فوت شدگان بھائیوں کی اولاد بھی حصہ دار ہوگی تو کیا صرف بھتیجے ہوں گے یا بھتیجیاں بھی ہوں گی؟
۴) کیا مکان رقم اور کاروبار کی تقسیم کا طریقہ کار ایک ہی ہوگا؟
۵) تقسیم سے قبل کاروبار سے آنے والے نفع کی تقسیم کا طریقہ کار کیا ہوگا؟
۶) کیا کچھ نقد رقم میں سے بہنوں کو حق حاصل ہے کہ وہ متفقہ(صرف بہنیں) طور پر کچھ راہ اللہ میں دے دیں؟

جواب: 3-1) مرحوم کی تجہیز و تکفین، قرض کی ادائیگی اور اگر کسی کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد کل جائیداد منقولہ و غیر منقولہ (گھر، کاروبار اور تمام متروکہ چیزوں کو) چون (54) حصوں میں تقسیم کیا جائے گا، جس میں سے چاروں زندہ بہنوں میں سے ہر ایک بہن کو نو (9) اور نو بھتیجوں میں سے ہر ایک بھتیجے کو دو (2) حصے ملیں گے، جبکہ بھتیجیوں کو اس صورت میں کچھ نہیں ملے گا۔
فیصد کے اعتبار سے ہر ایک بہن کو %16.66 فیصد اور ہر ایک بھتیجے کو %3.70 فیصد حصہ ملے گا۔
5-4) مکان، کاروبار، رقم، نفع اور تمام متروکہ سامان پچھلی شق میں ذکر کردہ اصول کے مطابق تمام شرعی ورثاء میں تقسیم ہوگا۔
6) اگر مرحوم کے تمام ورثاء (بہنیں اور بھتیجے) سب عاقل و بالغ ہیں اور وہ اپنی خوشی سے متروکہ رقم میں سے اللہ کی راہ میں کچھ صدقہ کرنا چاہتے ہیں تو کر سکتے ہیں، تاہم بہتر یہ ہے کہ رقم کو ذکر کردہ حصوں کے مطابق تقسیم کر کے تمام ورثاء کو ان کا حصہ دے دیا جائے، اس کے بعد جو وارث اپنے حصہ میں سے مرحوم کی طرف سے اللہ کی راہ میں صدقہ کرنا چاہے تو وہ اپنے حصے سے کر لے، لیکن اگر کوئی وارث راضی نہ ہو تو دیگر ورثاء کو اس کا حصہ دینا لازم ہوگا۔