سوال: میں نے پچھلے سال رمضان سے پہلے ایک دکان قسطوں پر 32 لاکھ کی خریدی جو کہ اس نیت سے لی تھی کہ جب بھی اچھے پیسے ملیں گے، فروخت کردوں گا، اس ایک سال میں اس کے 15لاکھ روپے ادا کر چکا ہوں، دوکان ابھی تک بلڈر کے پاس ہی ہے اور میں نے فروخت کرنے کا بول دیا ہے۔ اب ایسی صورت میں رہنمائی فرمائیں کہ 15 لاکھ کی رقم پر زکوٰۃ ادا کرنی ہوگی؟

جواب: واضح رہے کہ قسطوں پر دکان خریدنے سے خریدار اس کا مالک بن جاتا ہے، خواہ اس دکان پر قبضہ کیا ہو یا نہ کیا ہو، لہذا اگر آپ نے یہ دکان تجارت کی نیت سے خریدی ہے تو اس کی موجودہ قیمت فروخت اگر نصاب (ساڑھے باون تولہ چاندی کی قیمت) کے برابر یا اس سے زیادہ ہو تو سال گزرنے پر جن قسطوں کی ادائیگی زکوۃ کے رواں سال میں واجب ہوگئی تھی، وہ کل رقم سے منہا کرنے کے بعد بقیہ رقم کی زکوۃ ادا کی جائے گی، البتہ ادا شدہ قسطوں (paid amount) پر زکوٰۃ لازم نہیں ہے۔