سوال: سوال یہ پوچھنا ہے کہ بچوں کے لیے رکھے گئے سونے، گھر کی تعمیر کے لیے جمع کردہ رقم اور شوہر کی طرف سے بچوں کے خرچ کے لیے دی گئے رقم پر زکوۃ ہے یا نہیں؟

جواب: مذکورہ سوال میں تین چیزوں کی زکوٰۃ کے متعلق پوچھا گیا ہے، جن کا حکم بالترتیب درج ذیل ہے:‏
‏(1) اگر بچوں کو اس سونے کا مالک بنایا گیا ہو تو بالغ ہونے سے پہلے ان پر اس کی زکوٰۃ واجب نہیں ہے، جبکہ ‏بالغ ہونے کے بعد ان پر اس کی زکوة لازم ہوگی، بشرطیکہ زکوة کی شرائط پائی جائیں، لیکن اگر بچوں کو اس سونے کا مالک نہ بنایا گیا ہو، بلکہ ملکیت والد یا والدہ کی ہو تو اس صورت میں والد یا والدہ پر ‏اس کی زکوٰۃ واجب ہوگی، بشرطیکہ نصاب مکمل ہو اور مکمل سال بھی گذر جائے۔ ‏
‏(2) گھر بنانے کے لیے جمع کیے گئے پیسوں پر نصاب اور سال مکمل ہونے کی شرط کے ساتھ زکوٰۃ ‏واجب ہے، البتہ سال گذرنے سے پہلے پہلے خرچ ہو کر نصاب سے کم ہوجائیں تو ان پیسوں پر زکوٰۃ واجب نہیں ہوگی۔
‏(3) چونکہ یہ پیسے والد کی ملکیت سے نکل کر بچوں کی ملکیت میں داخل ہوگئے ہیں، اس لئے ان کے ‏حکم میں بھی وہی تفصیل ہے جو سونے کے حکم میں تحریر کی گئی کہ بالغ بچوں پر ان کے پیسوں کی زکوٰۃ واجب ہے، ‏اگر وہ نصاب کو پہنچ جائیں اور ان پر مکمل سال بھی گذر جائے، جبکہ نابالغ بچوں پر زکوٰۃ واجب نہیں ہے۔