سوال: مفتی صاحب! ہاتھ اٹھا کر دعا مانگنے کا حدیث سے کوئی حوالہ مطلوب ہے، براہ کرم رہنمائی فرمادیں۔

جواب: دعا کے لیے ہاتھ اٹھانا دعا کے آداب میں سے ہے، یہ کئی روایات سے ثابت ہے، علمائے کرام نے ان روایات کی روشنی میں دعا کے لیے ہاتھ اٹھانے کو مستحب قرار دیا ہے اور بعض علمائے کرام نے سنت قرار دیا ہے، کیونکہ اس طرح دعا کرنے میں زیادہ عاجزی اور تواضع کا اظہار ہے۔
ذیل میں اس حوالے سے کچھ روایات کا ترجمہ ذکر کیا جاتا ہے:
۱) حضرت ابو موسیٰ اشعری رضی اللہ عنہ فرماتے ہیں کہ حضور نبی اکرم ﷺ نے دعا کی اور اپنے دونوں ہاتھ اٹھائے، یہاں تک کہ میں نے آپ ﷺ کے مبارک بغلوں کی سفیدی دیکھی۔ (صحيح بخاری، حدیث نمبر: 6341)
۲) حضرت عمربن خطاب رضی اللہ عنہ سے مروی ہے کہ جب جناب رسول اللہ ﷺ دعا میں ہاتھ اٹھاتے تھے تو جب تک اپنے دونوں ہاتھ منہ پر پھیر نہ لیتے انہیں نیچے نہ کرتے تھے، محمد بن مثنیٰ اپنی روایت میں کہتے ہیں: آپﷺ دونوں ہاتھ جب دعا کے لیے اٹھاتے تو انہیں اس وقت تک واپس نہ لاتے، جب تک کہ دونوں ہاتھ اپنے چہرے پر پھیر نہ لیتے۔ (سنن ترمذی ،حدیث نمبر: 3386)
۳) حضرت عمر بن خطاب رضی اللہ عنہ سے روایت ہے کہ جس دن بدر کی لڑائی ہوئی، رسول اللہ ﷺ نے مشرکوں کو دیکھا وہ ایک ہزار تھے اور آپ ﷺ کے اصحاب تین سو انیس تھے۔ رسول اللہ ﷺ نے مشرکوں کو دیکھا اور قبلہ کی طرف منہ کیا، پھر دونوں ہاتھ پھیلائے، اور پکار کر اپنے پروردگار سے دعا کرنے لگے۔ (صحيح مسلم، حدیث نمبر: 1763)
۴) سلمان رضی اللہ عنہ کہتے ہیں کہ نبی اکرم ﷺ نے فرمایا: ”تمہارا رب "حی" (بہت زیادہ حیاء والا) اور کریم ہے، اسے اس بات سے شرم آتی ہے کہ اس کا بندہ اس کے سامنے ہاتھ پھیلائے تو وہ انہیں خالی یا نامراد لوٹا دے" (سنن ابن ماجہ، حدیث نمبر: 3865)
۵) حضرت فضل بن عباس رضی اللہ عنہما روایت کرتے ہیں کہ رسول اللہ ﷺ نے فرمایا: نماز (نفل) دو دو رکعتیں ہیں، ہر دو رکعت کے بعد تشہد ہے، خشوع و خضوع ہے اور اس کے بعد سنجیدگی اور وقار کے ساتھ اللہ تعالیٰ کے حضور دعا و التجاء ہے۔ سکون اور اپنے رب کی طرف ہاتھوں کو (دعا میں) اس طرح اٹھانا کہ ان کا اندرونی حصہ منہ کی جانب رہے اور پھر کہنا : اے رب! اے رب! جس نے ایسا نہ کیا وہ ایسا ہے وہ ایسا ہے(یعنی جس نے اللہ کے حضور دعا کے لیے ہاتھ نہ اٹھائے، وہ محروم ہے)۔‘‘ (سنن ترمذی،حديث نمبر:385)
علامہ جلال الدین سیوطی (م911ھ) فرماتے ہیں: دعا کے لیے ہاتھ اٹھانے کے بارے میں حضور نبی اکرم ﷺ سے تقریبًا سو کے قریب احادیث منقول ہیں، جن میں یہ مذکور ہے کہ آپ ﷺ نے دعا میں ہاتھ بلند فرمائے ہیں، ان تمام احادیث کو میں نے ایک مستقل کتاب میں جمع کر دیا ہے، اگرچہ یہ دعائیں مختلف قضایا سے متعلق ہیں، مگر ان میں ہاتھ اٹھانا چونکہ قدرِ مشترک ہے، اس لیے یہ (ہاتھ اٹھا کر دعا کرنا) مجموعی اعتبار سے احادیثِ متواترہ (سے ثابت) ہے۔
علامہ جلال الدین سیوطی (م911ھ) کا یہ رسالہ ’’فض الوعا في أحادیث رفع الیدین في الدعاء ‘‘ کے نام سے طبع ہوچکا ہے۔