سوال: ہمارا لیزر مشین کٹنگ کا کام ہے، جب بھی کوئی آرڈر آتا ہے تو پہلے ہمیں اس کی ڈرائنگ بنانی ہوتی ہے، پھر اس چیز کی کٹنگ کرنی ہوتی ہے، بسا اوقات غیر مذہب والے اپنے عقائد کی چیزیں ہم سے کٹنگ کروانے کے لیے آتے ہیں: جیسے مولا علی، پنچتن پاک وغیرہ کی کٹنگ کا آرڈر آتا ہے تو کیا ہمارے لیے ان چیزوں کی کٹنگ کرکے دینا صحیح ہے اور کیا اس کے عوض ملنے والی اجرت ہمارے لیے حلال ہے؟

جواب: کسی چیز کی کٹنگ یا ڈیزائننگ کرنے عوض طے شدہ اجرت لینا بذات خود جائز کام ہے، تاہم ایسی چیزیں تیار کرنا جس سے کفریہ یا شرکیہ عقائد و نظریات کی ترویج و تشہیر ہوتی ہو، "تعاون علی الاثم" یعنی گناہوں کے کاموں میں معاونت پر مشتمل ہونے کی وجہ سے جائز نہیں ہے، اس سے اجتناب لازم ہے، اور جن کاموں سے بالواسطہ (سبب بعید کے درجے میں) معاونت لازم آتی ہو، ایسے کاموں سے بھی اجتناب کرنا بہتر ہے۔
واضح رہے کہ شرعی حکم کا دار و مدار ہر چیز کے حساب سے مختلف ہوگا، جیسا کہ "پنجتن پاک" کے الفاظ ایک مخصوص گمراہ فرقہ اپنے باطل نظریہ کے طور استعمال کرتا ہے، لہذا ایسی علامات یا الفاظ کی کٹنگ یا ڈیزائنگ کرکے دینا "تعاون علی الاثم" کی وجہ سے درست نہیں ہے، جبکہ "مولا علی" کے الفاظ درست مفہوم میں بھی استعمال ہوسکتے ہیں، نیز کوئی گمراہ فرقہ اسے اپنے غلط نظریہ کی ترویج کیلئے بھی استعمال کرسکتا ہے، اس لئے ایسے نظریات کے حامل لوگوں کو ان الفاظ کی ڈیزائینگ اور کٹنگ کرکے دینا سبب بعید کے درجے میں "تعاون علی الاثم" کی ایک صورت ہے، جس سے اجتناب کرنا بہتر ہے۔