سوال: حضرت حفصہ رضی اللہ عنہا روایت کرتی ہے کہ نبی کریم صلی اللہ علیہ وسلم چار کام کبھی نہیں چھوڑتے تھے۔ عاشوراء کا روزہ، ذوالحجہ کے پہلے عشرے کے روزے، ہر مہینے سے تین دن کے روزے اور نماز فجر سے پہلے دو رکعتیں۔ (سنن نسائی: 2418) اس روایت کی تصدیق فرمادیں۔

جواب: سوال میں مذکور حدیث آنحضرت صلى اللہ علیہ وسلم سے ثابت ہے، "سنن نسائى "میں یہ حدیث ام المؤمنین حضرت حفصہ رضی اللّٰہ عنہا کے حوالے سے موجود ہے، "سنن نسائى" ہى کى سند سے "مسند احمد" میں اس حدیث کو نقل کیا گیا ہے، اس حدیث کى سند جید ہے، نیز اس حدیث کے اور شواہد بھى موجود ہیں، لہذا اس حدیث کو بیان کرنا اور اس میں مذکور فضیلت کو حاصل کرنے کے لیے ان ایام میں روزہ رکھنا مسنون ومستحب ہے۔
ذیل میں حدیث کا ترجمہ، اس کى تخریج اور اس کى اسنادى حیثیت کو بیان کیا جاتا ہے:
ترجمہ:
ام المؤمنين حضرت حفصہ رضي الله عنها فرماتی ہیں کہ رسول اللہ صلى اللہ علیہ وسلم چار کام کبھى فراموش نہیں فرماتے تھے: عاشوراء (دس محرم ) کا روزہ، ذوالحجہ کے ابتدائى عشرہ کے روزے، ہر ماہ کے تین دن (ایام بیض کے روزے) اور فجر کى نماز سے پہلے کى سنتیں۔ (سنن نسائی: حدیث نمبر 2416)
تخریج الحدیث:
1- امام احمد بن حنبل رحمہ اللہ (م 275 ھ) نے اس حدیث کو "مسند احمد" جلد 44 ص 59 رقم الحدیث (26459)، طبع: مؤسسۃ الرسالۃ، میں نقل فرمایا ہے۔
2- امام نسائى رحمہ اللہ (م 303 ھ) نے "سنن نسائى" (4 كتاب الصيام/ كيف يصوم ثلاثة أيام من كل شهر ... الخ، 4/ 220، رقم الحديث (2416)، ط: مكتب المطبوعات الإسلامية – حلب) میں نقل فرمایا ہے۔ اور "السنن الكبرى" (كتاب الصيام/ كيف يصوم ثلاثة أيام من كل شهر ... الخ، 3/ 197، رقم الحديث (2736-2737)، ط: مؤسسة الرسالة) میں نقل فرمایا ہے۔
3- امام ابويعلى رحمه الله (م 307 ھ) نے "مسند ابی یعلى" میں (12/ 469، رقم الحديث (7041)، اور (12/ 477، رقم الحديث (7048-7049)،ط: دار المأمون للتراث) میں نقل فرمایا ہے۔
4- امام ابن حبان رحمہ اللہ (م 354 ھ) نے "صحیح ابن حبان" (كتاب التاريخ/ باب من صفته صلى الله عليه وسلم وأخباره.، 14/ 332، رقم الحديث (6422) ط: مؤسسة الرسالة) میں نقل فرمایا ہے۔
5- امام طبرانی رحمہ اللہ (م 360 ھ) نے " المعجم الکبیر" (23/ 205، رقم الحديث (354) ط: مكتبه ابن تيمية) میں اور "المعجم الأوسط" (8/ 20، رقم الحديث (7831)، ط: دار الحرمين) میں نقل فرمایا ہے۔
حدیث کى اسنادى حیثیت:
علامہ ساعاتی رحمہ اللہ
(م 1378 ھ) نے "الفتح الرباني" (كتاب الصيام/ النهي عن صوم يوم عرفة ويوم النحر وأيام التشريق، 10/ 163، ط: دار إحياء التراث العربي ) میں اس حدیث کو نقل کر کے فرمایا ہے، اس کى سند جید ہے۔