سوال: رسول اللہ ﷺ کا ارشاد ہے: حج کیا کرو، کیونکہ حج گناہوں کو اس طرح دھودیتا ہے جیسے پانی میل کو دھودیتا ہے۔ (معجم اوسط: 4997) اس روایت کی تصدیق فرمادیں۔

جواب: کسی بھی حدیث کے متعلق اس کی تصدیق یا تحقیق مطلوب ہو تو اس کے متعلق اپنی لا علمی کا اظہار کر کے پوچھنا چاہیے، آپ کے سوال کے الفاظ سے ایسا معلوم ہوتا ہے کہ آنجناب اس حدیث پر مکمل تحقیق فرما کر اس کے "موضوع" من گھڑت ہونے کا حکم لگا رہے ہیں، جبکہ حدیث کا مضبوط علم رکھنے والے اہل علم بھی کسی حدیث کے متعلق ایسے الفاظ میں تبصرہ نہیں کرتے ہیں، لہذا اس حوالے سے محتاط الفاظ کا چناؤ کرنا چاہیے۔
سوال میں مذکور حدیث حضرت عبد اللہ بن جرادؓ سے ثابت ہے، اس حدیث کو امام طبرانیؒ (م 360 ھ) نے "المعجم الأوسط" میں نقل فرمایا ہے، اس حدیث کى سند میں ایک راوی پر محدثین کا سخت کلام ہے، اس اعتبار سے یہ حدیث محدثین کی اصطلاح کے مطابق "صحیح" حدیث کے زمرے میں نہیں آتی ہے، تاہم چونکہ یہ حدیث فضائل سے متعلق ہے اور اس میں بیان کی گئی فضیلت صحیح احادیث سے بھی ثابت ہے، اس لیے اس حدیث کو ضعف کی صراحت کے ساتھ بیان کیا جا سکتا ہے۔
ذیل میں اس حدیث کا ترجمہ، تخریج اور اس حدیث کی اسنادی حیثیت اور اس حدیث کے مضمون جیسی صحیح روایات کا ذکر کیا جاتا ہے:
ترجمہ: حضرت عبداللہ بن جراد رضی اللّٰہ عنہ سے مروی ہے کہ رسول اللہ صلی اللّٰہ علیہ وسلم نے ارشاد فرمایا: "حج کرو، بلاشبہ حج گناہوں کو اس طرح دھو ڈالتا ہے، جیسے میل کچیل کو پانی دھو کر صاف کر دیتا ہے"۔ (المعجم الأوسط: حدیث نمبر: 4997)
تخریج الحدیث:
محدث أبو بكر محمد بن إبراهيم العدوي رحمہ اللّٰہ (م 417 ھ) نے اپنی احادیث کے مجموعہ (جو کہ مخطوطہ کی شکل میں ہے) میں ص 5 رقم الحدیث (14) میں اس حدیث کو بعض الفاظ کے اضافے کے ساتھ بیان فرمایا ہے، ان کا ترجمہ حسب ذیل ہے:
حضرت عبداللہ بن جراد رضی اللّٰہ عنہ سے مروی ہے کہ رسول اکرم صلی اللّٰہ علیہ وسلم نے ارشاد فرمایا: جس نے جھگڑے، ریا کاری سے پرہیز کرتے ہوئے حج ادا کرے، تو جب بھی اس کی سواری قدم بڑھاتی ہے، تو اس کا ایک درجہ بلند ہوتا ہے اور اس کى سوارى جب بھى رکتی ہے، تو اس سے اس کى ایک لغزش معاف کر دى جاتى ہے۔ اور تم حج کروا، بے شک حج گناہوں کو ایسے دھو ڈالتا ہے جیسے پانى میل کچیل کو دھو ڈالتا ہے"۔ (حدیث ابو بکر العدوی رحمہ اللہ: حدیث نمبر: 14)
حدیث کى اسنادى حیثیت:
اس حدیث کو علامہ ہیثمى رحمہ اللہ (م 807 ھ) نے "مجمع الزوائد" جلد 3 ص 480، رقم الحدیث (5277)، ط: دار الفکر-بیروت، میں امام طبرانی کے حوالے سے نقل کر کے فرمایا ہے: اس حدیث کو امام طبرانی نے "المعجم الاوسط" میں روایت کیا اور اس روایت کى سند میں ایک راوى ہیں "یعلى بن الأشدق" وہ کذاب ہیں۔
مذکورہ بالا حدیث کے مضمون کا صحیح روایات سے ثبوت:
اس حدیث میں مذکور مضمون (حج کرنے سے گناہ معاف ہو جاتے ہیں) دیگر متعدد احادیث میں بھى بیان ہوا ہے، ذیل میں ان میں سے تین روایات نقل کی جاتی ہیں:
۱) حضرت ابوہریرۃ رضی اللہ عنہ روایت کرتے ہیں کہ میں نے رسول اللہ صلى اللہ علیہ وسلم کو یہ فرماتے ہوئے سنا: "جو شخص اس طرح حج کرے کہ وہ حج کے دوران اپنے آپ کو لڑائى جھگڑے ،فسق وفجور اور بدکلامى وبد مزاجى سے دور رکھے، تو وہ حج کر کے گناہوں سے ایسا پاک وصاف ہو کر لوٹے گا،جیسا کہ نومولود بچہ ماں کے پیٹ سے پیدائش کے وقت ہر گناہوں سے پاک و صاف ہوتا ہے"۔ (صحیح بخارى: حدیث نمبر: 1521)
۲) حضرت عبد اللہ بن مسعود رضی اللہ عنہ روایت فرماتے ہیں کہ رسول اللہ صلى اللہ علیہ وسلم نے ارشاد فرمایا: "حج اور عمرہ پے در پے کرتے رہو، اس لیے کہ حج وعمرہ گناہوں اور فقر وفاقہ کو اس طرح دور کر دیتے ہیں جس طرح بھٹى لوہے، سونے اور چاندى کے میل کو دور کر کے صاف کردیتى ہے، اور حج مبرور (حج مقبول جو معصیت وغیرہ سے پاک ہو) کا ثواب صرف جنت ہے"۔ (سنن ترمذى: حدیث نمبر: 810)
۳) حضرت عبد المطلب بن حنطب رحمہ اللہ فرماتے کہ رسول اکرم صلى اللہ علیہ وسلم نے کچھ لوگوں کو دیکھا کہ انہوں نے اپنے سر منڈوائے ہوئے تھے، تو آپ صلى اللہ علیہ وسلم نے حضرت عمر رضی اللہ عنہ سے فرمایا: "ان لوگوں سے دریافت کرو: کس چیز نے انہیں اس بات (سر منڈوانے ) پر آمادہ کیا ہے؟" انہوں نے عرض کیا:عمرہ (یعنى ہم نے عمرہ کرنے کے بعد سر منڈوایا ہے) اس پر آپ صلى اللہ علیہ وسلم نے ارشاد فرمایا: "یہ لوگ اس حال میں واپس لوٹے ہیں کہ ان کے پیچھے ان کے گناہ نہیں آئے" (یعنى ان کے گناہوں کى بخشش ہو گئى ہے)۔(مصنف عبد الرزاق: حدیث: 8815)
خلاصہ:
اگرچہ سوال میں مذکور حدیث "ضعیف" ہے، لیکن اس کا مضمون صحیح احادیث سے بھى ثابت ہے، نیز یہ حدیث فضائل سے تعلق رکھتى ہے اور فضائل کے باب میں ضعیف حدیث کو بیان کیا جا سکتا ہے، لہذا اس حدیث کو ضعف کى صراحت کے ساتھ بیان کیا جا سکتا ہے۔