سوال: میں نے آیت الکرسی کا ایک فریم آن لائن خریدا تھا جو مجھے پسند نہیں آیا، میں نے واپس کردیا ہے اور مجھے میرے پیسے ایزی پیسہ کے ذریعہ مل گئے، لیکن وہ فریم اب بھی میرے پاس پارسل رکھا ہوا ہے، اس کے مالک نے اس کی واپسی کے لیے اب تک رابطہ نہیں کیا، ان کا رابطہ نمبر بھی ڈیلیٹ ہوگیا ہے اور ایڈریس بھی نہیں معلوم، لیکن ان کو ہمارا ایڈریس بھی معلوم ہے اور ہمارا رابطہ نمبر بھی ان کے پاس ہے، اس بات کو چھ یا سات ماہ ہوچکے ہیں، کیا میں یہ فریم اپنی نوکرانی کو دے سکتی ہوں؟

جواب: پوچھی گئی صورت میں سودا ختم ہونے کی صورت میں جس طرح ان پر آپ کی رقم واپس کرنا ضروری تھا ‏اور انہوں نے آپ کی رقم واپس کردی، اسی طرح آپ کی بھی ذمہ داری تھی اور آپ پر لازم تھا کہ اسی وقت ان کی ‏مذکورہ امانت انہیں واپس بھجواتے ( جس نمبر سے آپ کا ان سے رابطہ ہوا تھا یا جس نمبر سے انہوں نے آپ کو رقم ‏بھیجی تھی اس پر رابطہ کرکے)، لیکن آپ نے بروقت اپنی ذمہ داری پوری نہیں کی، جو گناہ کی بات ہے، البتہ اب بھی جو ممکنہ ذرائع ہیں انہیں بروئے کار لاکر ان سے رابطہ کرلیں ( مثلاً ‏‎:‎اگر یہ فریم کسی اسٹور سے آپ کے پاس آیا ہے تو ‏اس کے نام کی ویب سائٹ تلاش کرکے ان سے رابطہ کرلیں یا جس کوریئر سروس کے ذریعے آپ تک سامان پہنچا ہو، ان کی مدد لے ‏لیں، یا فیصل آباد کے جس علاقہ سے آیا ہے اگر ممکن ہو تو اس علاقے کے لوگوں سے معلومات لیں وغیرہ وغیرہ) ‏تاہم اگر ہر ممکن کوشش کے باوجود کسی بھی طرح ان سے رابطہ نہ ہوسکے اور آپ کو اس بات کا غالب گمان ہوجائے ‏کہ اب ان تک یہ چیز نہیں پہنچائی جاسکتی تو اس صورت میں آپ چاہیں تو کسی مستحق شخص کو مالک کی طرف سے یہ ‏فریم صدقہ کردیں یا اسے بیچ کر اس کی قیمت ان کی طرف سے صدقہ کردیں، البتہ جب بھی وہ واپس ملیں، انہیں اس بات کا اختیار حاصل ہوگا کہ وہ چاہیں تو اس صدقہ کی اجازت دے دیں اور چاہیں تو آپ سے اپنی چیز (اگر موجود ہو) یا اس ‏کی رقم کا مطالبہ کرلیں اور ان کے مطالبہ پر شرعاً آپ ان کی چیز یا اس کی قیمت انہیں دینے کے پابند ہوں گے۔ ‏