سوال: میرا ایک بہت مخلص دوست تھا، اُس نے مجھ سے کہا کہ زبیر آپ مجھے ایک کروڑ یا پچاس لاکھ کی رقم دیں، میں آپ کو مال لےکردونگا جس کا نفع نقصان میں ہم دونوں برابر کےشریک ہونگے۔ میں نے اپنے دوست کو کوشش کرکے پچاس لاکھ سے شروع کرکے ایک کروڑ آٹھ لاکھ روپیہ دیے جس میں سے میرے دوست نے مجھے ایک کروڑ آٹھ لاکھ روپیہ کا مال لےکر دیا ۔ مال لینے کے بعد ہم نے کافی دن انتظار کیا، لیکن مال نفع پر فروخت نہیں ہورہا تھا، بلکہ نقصان پر فروخت ہورہا تھا ۔اس دوران میں نے اپنے دوست سے کہا کہ آپ بےفکر رہیں، بالکل ٹینشن نہ لیں۔ اس مال کے نقصان میں آپ کو میں شریک نہیں کروں گا، آپ میری طرف سے آزاد ہو ۔
میں نے مال آٹھ سے سات لاکھ کے نقصان پر فروخت کردیا اور میں اس نقصان پر بھی اللہ کا شکر ادا کرتا رہا کہ اے میرے رب ہر کام میں آپ کا خیر ہوگا اور میں خاموش رہا ۔
کچھ دن بعد مجھے ایک شخص ملا اُس نے کہا کہ آپ کے دوست کا مال میری توسط سے میں نے اپنے کزن سے سودا کروایا تھا، جس میں آپ کے دوست نے مجھے کہا تھا کہ یہ مال مجھے لےکر دو، میں آپ کو ایک لاکھ بیس ہزار روپیہ کمیشن دوں گا ۔ اب تمہارے دوست نے مجھ سے کہا کہ یار میں نے تو آپ کی آدھی رقم زبیر کو (یعنی مجھے) نقصان کی عوض میں ادأ کردی ہے۔ میں نے ان سے کہا کہ دیکھیں اُس کو میں نے نقصان کے معاملہ سے مستسنی کردیا ، لہذا اُس نے مجھے کوئی نقصان نہیں دیا ہے، وہ جھوٹ بول رہا ہے، پھر میں نے اُن سے مال کے متعلق پوچھا کہ آپ نے سودا کتنے روپیہ فی کلو کروایا تھا تو اس نے مجھے کہا کہ میں نے رزاٸی آٹھ سو روپیہ کلو اور جاکٹ سات سو روپیہ میں ،حالانکہ میرے دوست نے رزاٸی آٹھ سو بیس روپیہ اور جاکٹ ساتھ سو پندرہ روپیہ میں دیا تھا ۔جو درحقیقت میرے دوست نے مال میں ٹوٹل وزن کے حساب سے دولاکھ چالس ہزار کے قریب مجھ سے زیادہ پیسے لیٸے۔
اب کیامیں اس زیادہ رقم کا مطالبہ اور باقی نقصان جس میں ہم برابر کے شریک ہیں کا مطالبہ کرسکتا ہوں؟
نوٹ : جس نقصان سے میں نے اپنے دوست کو مستسنی کیا تھا، اُس وقت میری نیت یہ تھی کہ میرے دوست نے سچ بول کر آٹھ سو بیس روپیہ میں لےکر مجھ پر فروخت کیا تھا، حالانکہ معاملہ اس طرح نہیں تھا، بلکہ فی کلو وزن بیس روپیہ اور پندرہ روپیہ جھوٹ بول کر اپنے لیے نفع رکھا تھا ، جس پر مجھے کافی افسوس ہوا اور میں نے سوچھا کہ یا اللہ میری نیت تو معاف کرنے کی وجہ یہی تھی کہ میرے دوست نے مجھ سے نفع نہیں رکھا ہوگا، کیونکہ وہ مجھ سے نفع نقصان میں برابر کا شریک تھا۔اس بارے میں رہنمائی فرمائیں۔

جواب: سوال میں ذکرکردہ صورت میں آپ نے مال فراہم کیا ہے اور آپ کے دوست نے اپنی خدمات ‏‏(‏Services‏) پیش کی ہیں، لہذا یہ معاملہ شرعاً " عقدِ" مضاربت" کا ہے اور مضاربت میں نفع اور نقصان کا شرعی ‏اصول یہ ہے کہ نفع طے شدہ شرائط کے مطابق فیصد کے اعتبار سے فریقین میں تقسیم ہوگا، جبکہ نقصان صرف ‏رب المال (جس کا سرمایہ لگا ہو) کے ذمہ ہوگا، بشرطیکہ مضارب (کام کرنے والے) کی طرف سے کوئی غفلت یا ‏کمی کوتاہی اور دھوکہ یا خیانت نہ ہو، اگر اس کی طرف سے کام میں کمی کوتاہی، غفلت یا خیانت کی وجہ سے نقصان ہوجائے ‏تو پھر وہ (مضارب) نقصان کا ذمہ دار ہوگا۔
لہٰذا اگر آپ کا بیان درست ہے اور واقعتاً آپ کے دوست نے سامان کی اصل قیمتِ فروخت آپ سے ‏چھپا کر آپ کو نقصان پہنچایا ہے تو آپ اس سے اس کی اس غلط بیانی کے نتیجہ میں ہونے والے نقصان کی رقم لے ‏سکتے ہیں۔