سوال: مفتی صاحب! میرے چند سوالات ہیں، براہ کرم ان سوالات کے جوابات درکار ہیں: (۱) کيا فجرکی نمازکا وقت ہونے کے بعد سنتوں سے پہلے قضا نمازپڑھ سکتے ہيں؟ (۲) کيا فجرکی سنتوں کے بعد قضا نماز پڑھ سکتے ہيں؟ (۳) کيا عصرکی فرض نماز کے بعد قضا نماز پڑھ سکتے ہيں؟

جواب: (1، 2، 3)واضح رہے کہ تین مکروہ اوقات کے علاوہ کسی بھی وقت قضاء نماز پڑھنا جائز ہے، لہٰذا پوچھی گئی صورت میں فجر کی سنتوں سے پہلے یا سنتوں کے بعد یا عصر کی نماز کے بعد مکروہ وقت سے پہلے پہلے قضاء نماز پڑھنا جائز ہے، اس میں کوئی حرج نہیں ہے، البتہ عصر اور فجر کی نماز کے بعد اور صبح صادق کے بعد فجر کی نماز سے پہلے لوگوں کے سامنے قضا نماز نہیں پڑھنی چاہیے، اگر ان اوقات میں قضا نماز پڑھنی ہو تو ایسی جگہ پڑھے جہاں لوگ نہ دیکھیں، اس لیے کہ ان اوقات میں نفل نماز ادا کرنا منع ہے، اور قضا نماز پڑھنے سے اپنے گناہ کی پردہ دری لازم آتی ہے۔