سوال: والد صاحب نے اپنی زندگی میں ہی اپنے پانچ بیٹوں کو اپنی اور سابقہ مرحومہ بیوی کو اس کے والد صاحب کی طرف سے دی گئی زمین کے کل پانچ حصے بنا کر پانچ بیٹوں کو سپرد کر دیے، اور بیٹیوں کے حصے میں ملنے والی ان کی مرحومہ والدہ کی وراثتی زمین بھی بیٹوں کے حصے میں دے دی اور یہ کہا کہ بیٹی اور داماد اگر زمین کا حصہ لیں تو مجھ سے مطالبہ کریں، بھائیوں کے مقررہ حصے سے نہ لیں، جبکہ قانون کے مطابق والدہ کی طرف سے وراثت میں ملنے والی زمین لڑکیوں کے نام رجسٹرڈ ہے۔
۱) اس ضمن میں سوال یہ ہے کہ کیا والد صاحب کا اپنی جائیداد میں سے بیٹیوں کو محروم کرنا صحیح ہے؟
۲) کیا والد صاحب کی وفات کے بعد بہنیں اس زمین کی حقدار ہیں جو ان کی والدہ کی وراثت میں ان کے نام منتقل ہو گئی‎ ہے؟

جواب: ۱) زندگی میں اپنی اولاد کے درمیان ہبہ کرنے کا شرعی طریقہ یہ ہے کہ اپنی جائیداد میں سے اپنے لیے جتنا چاہے رکھ لے، تاکہ بوقتِ ضرورت کام آئے، اور بقیہ جائیداد اپنی تمام اولاد میں برابر تقسیم کردے، یعنی جتنا بیٹے کو دے، اتنا ہی بیٹی کو دے، نہ کسی کو محروم کرے، اور نہ ہی بلا وجہ کمی بیشی کرے، البتہ اگر وہ اولاد میں سے کسی کو معقول وجہ (مثلاً: اولاد میں سے کسی کی مالی حالت کمزور ہونے، زیادہ خدمت گزار ہونے، علم دین میں مشغول ہونے یا کسی اور وجہ فضیلت کی وجہ) سے زیادہ دیتا ہے، اور اس سے دوسرے بچوں کو محروم کرنا یا نقصان پہنچانا مقصود نہ ہو تو شرعاً وہ گناہ گار نہیں ہوگا۔
پس اگر پوچھی گئی صورت میں بیٹوں کو جائیداد دینے میں ان وجوہات میں سے کوئی وجہ نہیں تھی تو والد کا بیٹیوں کو محروم کرنے کا یہ عمل غیر منصفانہ تھا، لیکن اس کے باوجود اگر آپ کے والد نے پانچوں بیٹوں کو جائیداد نام کرنے کے ساتھ ساتھ قبضہ اور ملکیت بھی دیدی تھی تو شرعاً یہ ہبہ(گفٹ) مکمل ہوگیا، اور پانچوں بیٹے اپنے اپنے حصہ کے مالک بن گئے، بیٹیوں کا اس میں کوئی حصہ نہیں ہوگا۔
واضح رہے کہ مذکورہ بالا حکم زندگی میں تقسیم کرنے والی جائیداد کے بارے میں ہے، البتہ جو جائیداد تقسیم نہیں کی تھی، اس میں والد کے مرنے کے بعد تمام شرعی ورثاء اپنے حصص کے بقدر حقدار ہوں گے۔
نوٹ: پانچوں بیٹے اگر مناسب سمجھیں تو والد کو اس غیر منصفانہ تقسیم کے گناہ سے بچانے کے لیے اپنے اپنے حصے سے اپنی بہنوں کو بھی کچھ دے کر راضی کرلیں، تاکہ ان کے والد کو آخرت میں پریشانی نہ ہو۔
۲) چونکہ مرحومہ بیوی کو اپنے والد کی میراث میں سے ملنے والے حصہ میں شوہر کی مکمل ملکیت نہیں تھی، بلکہ دیگر ورثاء بھی اس میں شامل تھے، اس لیے شوہر کو اپنی بیوی کی میراث میں سے صرف اپنے حصے کے بقدر تو ھبہ کرنے کا حق حاصل تھا، بیٹیوں کے حصے کا ھبہ کرنے کا حق حاصل نہیں تھا، اس لیے بیٹیوں کے حصے کا ھبہ تام نہیں ہوا، اور وہ بدستور بیٹیوں کی ہی ملکیت ہے، لہذا بیٹوں کو چاہیے کہ وہ اپنی بہنوں کا حصہ واپس کریں۔