سوال: السلام علیکم، مفتی صاحب ! جمعہ کی تیاری جمعرات سے کرنے کی کیا فضیلت ہے اور تیاری سے کیا مراد ہوگا؟

جواب: حجۃ الاسلام امام غزالیؒ نے ’’احیاء علوم الدین‘‘ میں ’’ باب آداب الجمعہ" جمعرات کے دن سے جمعہ کی تیاری کے بارے میں لکھا ہے کہ
جمعہ کی فضیلت پانے کے لئے جمعرات کے دن سے جمعہ کی تیاری شروع کرنا چاہیئے اور جمعرات کو عصر کے بعد سے تسبیح، استغفار اور اذکار میں مشغول ہو، کیونکہ یہ گھڑی جمعہ کے دن قبولیت کی گھڑی سے مقابل ہوجائے گی۔
ہمارے بعض اسلاف نے فرمایا: کہ اللہ تعالیٰ نے مخلوق کے لیے رزق سے زائد بھی کچھ فضل اپنے پاس رکھا ہے، وہ صرف ان لوگوں کو حاصل ہوتا ہے، جو جمعرات کی شام اور جمعہ کے دن اللہ تعالیٰ سے مانگتے ہیں، جمعرات کو ہی جمعہ کے لیے کپڑے تیار کرے،
صفائی کرے،
خوشبو اگر موجود نہ ہو تو حاصل کرے اور اپنے آپ کو ہر اس کا م سے فارغ کرلے، جو جمعہ کی طرف جلدی جانے سے مانع ہو سکتا ہے۔
جمعہ کے روزے کی نیت بھی رات سے کرلے، لیکن یہ روزہ اس صورت میں مستحب ہے، جب اس کے ساتھ جمعرات یا ہفتے کا روزہ ملایا جائے، ورنہ مکروہ ہے۔
رات کو تلاوت قرآن پاک کا اہتمام کرے۔
بعض سلف کا قول ہے کہ جمعہ کے دن سب سے خوش بخت شخص وہ ہے، جو ایک دن پہلے سے اس کا انتظار و انتظام کر رہا ہو اور سب سے کم نصیب وہ ہے جو جمعہ کے دن یہ پوچھ رہا ہو کہ آج کیا دن ہے؟
بعض اسلاف تو یہاں تک اہتمام کرتے تھے کہ شب جمعہ کو جمعہ کی وجہ سے مسجد ہی میں گزارا کرتے تھے۔
اس ساری تفصیل سے پتہ چلا کہ جمعرات کے دن ہی سے جمعہ کا اہتمام کرنا چاہیئے ۔