سوال: میرا سعودی عرب میں ایک بینک اکاؤنٹ ہے، یہاں پر سارے بینک شرعی اصولوں پرعمل کرنے کے پابند ہیں۔ میرے بینک نے ایک نیا پروڈکٹ شروع کیا ہے، اگر میں اس میں ایک ہزار ریال رکھوں تو میرا نام ایک قرعہ ندازی میں شامل کیا جائے گا، جس میں ماہانہ 10,000 ریال یا اس سے بھی زیادہ انعام نکل سکتا ہے۔ کیا میں اس پروڈکٹ میں حصہ لے سکتا ہوں؟ رہنمائی فرمائیں

جواب: پوچھی گئی صورت میں اگر یہ اکاؤنٹ کسی اسلامی طریقہ تمویل (Islamic Mode of Finance) مثلاً مضاربہ یا مشارکہ کی بنیاد پر کھولا جاتا ہو تو ایسی صورت میں قرعہ اندازی کے ذریعے اکاؤنٹ ہولڈر کو انعام دینا شرعا درست ہے۔
لیکن اگر یہ اکاؤنٹ قرض کی بنیاد پر ہو یعنی اکاؤنٹ ہولڈر سے رقم بطور قرض لی جاتی ہو تو ایسی صورت میں قرض کی وجہ سے قرعہ اندازی کے ذریعے اکاؤنٹ ہولڈر کو انعام دینا قرض پر نفع حاصل کرنا ہے، جو کہ سود ہونے کی وجہ سے ناجائز اور حرام ہے۔
واضح رہے یہ اصولی جواب لکھا گیا ہے، یہ سہولت کس قسم کے اکاؤنٹ پر دی جا رہی ہے؟ اس کا ہمیں علم نہیں ہے، صحیح صورتحال معلوم کرنے کے لیے آپ مذکورہ بینک کے شرعی بورڈ کے علماء کرام سے رجوع کر سکتے ہیں۔