سوال: ہمارے دادا مرحوم نے ایک پلاٹ تعمیراتی مقاصد کے لیے خریدا تھا،لیکن ان کے انتقال کے بعد چچاؤں نے اپنے والد کے نام صدقہ جاریہ کے لیے مذکورہ پلاٹ پر مسجد تعمیر کی، جس کے اخراجات تمام بھائیوں نے مشترکہ طور پر بغیر کسی چندہ کے از خود ادا کیے۔ اب مسجد چونکہ تعمیر ہوچکی ہے، اس میں باقاعدہ پنج وقتہ نمازیں، جمعہ کی نماز اور عیدین کی نمازیں بھی ادا کی جاتی ہیں اور ساتھ ہی مسجد کی چھت پر عام رہائش بھی رکھی ہوئی ہے۔ اب وہ اس مسجد کو کسی مذہبی ادارے کے ہاتھ فروخت کرنا چاہتے ہیں، کیا یہ خرید و فروخت درست ہے؟
تنقیح:
اس سوال کے جواب کیلئے یہ وضاحت درکار ہے کہ آپ کے دادا مرحوم کے ورثاء نے اس زمین پر مسجد بنانے کے بعد وقف کردیا تھا یا نہیں؟ یا وقف کئے بغیر صرف لوگوں کیلئے نماز پڑھنے کی خاطر مصلیٰ بنایا تھا؟
جواب تنقیح:
مسجد بنانے کے بعد اسے وقف کردیا تھا۔
تنقیح 2:
دادا کے انتقال کے وقت کون کون سے ورثاء موجود تھے؟ اور کیا سب عاقل بالغ تھے؟نیز جب ورثاء (چچاؤں) نے مسجد تعمیر کی تھی تو تعمیر اور وقف کرتے وقت مسجد کے اوپر اپنے استعمال کیلئے رہائشی گھر بنانے کی شرط رکھی تھی، یا بغیر شرط کے ویسے ہی گھر بنا کر اس میں رہائش اختیار کرنا شروع کردی تھی؟ان امور کی وضاحت کے بعد ہی آپ کے سوال کا جواب دیا جاسکے گا۔
جواب تنقیح:
دادا کے انتقال کے وقت ورثاء میں ان کی اہلیہ (دادی) اور نو بیٹے (بشمول میرے والد کے) اور دو بیٹیاں تھیں، کل یہی اولاد تھی اور سب عاقل بالغ اور عیالدار تھے اور سب کی اجازت سے مسجد بنائی گئی تھی۔ (اب دادی اور ایک چچا کا انتقال ہوچکا ہے)
مسجد بناتے وقت صرف مسجد ہی کی نیت و ارادہ تھا، کسی کی بھی نہ رہائش کی نیت تھی اور ناہی باقاعدہ مسجد کے اوپر رہائش گاہ بنائی گئی تھی، البتہ بقول ورثاء (چچاؤں اور پھوپھیوں) کے؛ مسجد کو وقف نہیں کیا تھا کیونکہ یہ ذاتی پیسوں سے بنائی تھی۔ بعد میں بھی رہائش کا خیال کسی کو نہیں آیا سوائے مرحوم کے سب سے بڑے بیٹے کے، انہوں نے اپنا مکان فروخت کرنے کے باعث عارضی طور پر مسجد کی چھت پر کچھ کمرے، باتھ روم اور کچن وغیرہ بنوائے اور کہا تھا کہ، میں اپنا مکان خریدنے تک چند دنوں کے لیے یہاں رہائش پذیر ہوا ہوں اور پھر بعد میں وہ کہیں اور منتقل ہوگئے۔ ان کے جانے کے بعد دوسرے بھائیوں نے مستقل رہائش اختیار کر رکھی ہے۔ اور اب سب سے بڑے بھائی ہی کے کہنے پر سب نے (سوائے میرے والد کے) مسجد فروخت کرنے کا فیصلہ کیا ہے۔

جواب: واضح رہے کہ جب اپنی کسی مملوکہ جگہ میں مسجد بنا کر اس جگہ کو اپنی ملکیت سے جدا کرکے اس کا راستہ عام راستے کی طرف عام نمازیوں کے لیے کھول دیا جائے، اور اس میں ایک مرتبہ اذان اور جماعت ہوجائے تو یہ جگہ شرعی مسجد بن کر وقف ہوجاتی ہے، اور واقف کی ملکیت سے نکل کر اللہ تعالی کی ملکیت میں چلی جاتی ہے، اس کے بعد اس کی خرید و فروخت، ہبہ (Gift) وغیرہ جائز نہیں ہوتا۔
لہٰذا پوچھی گئی صورت میں جب آپ کے دادا کے انتقال کے بعد تمام ورثاء نے اپنی رضامندی سے اس پلاٹ پر مسجد تعمیر کرکے عام نمازیوں کیلئے کھول دی تھی، اور اس میں باقاعدہ پانچ وقت کی نمازیں ادا ہونا شروع ہوگئیں تو یہ وقف ہوگئی ہے، اب اس کو بیچنا جائز نہیں ہے۔
نیز مسجد کی چھت بھی شرعاً مسجد کے حکم میں ہے، لہٰذا مسجد کی چھت پر رہائشی گھر بنانا اور اس میں رہائش اختیار کرنا جائز نہیں ہے۔