سوال: غمی اور خوشی کے علاوہ ایک عورت اپنے پڑوسیوں سے کتنا میل میلاپ رکھ سکتی ہے؟ کیا نہ ملنے پر اسے گناہ ہوگا؟

جواب: واضح رہے کہ اسلام میں کسی خاص موقع پر پڑوسیوں کے گھر جانے کا حکم نہیں دیا گیا ہے، البتہ پڑوسیوں کی خبر گیری کرنا اور ان کے ساتھ حسن سلوک اور اچھا تعلق رکھنے کا حکم دیا گیا ہے، حضرت معاویہ بن حیدہ ؓ سے روایت ہے کہ رسول اللہ ﷺ نے ارشاد فرمایا: "پڑوسی کے حقوق تم پر یہ ہیں کہ اگر وہ بیمار ہو جائے تو اس کی عیادت اور خبر گیری کرو اور اگر انتقال کر جائے تو اس کے جنازے کے ساتھ جاؤ (اور تدفین کے کاموں میں ہاتھ بٹاؤ) اور وہ (اپنی ضرورت کے لئے) قرض مانگے تو (بشرط استطاعت) اس کو قرض دو اور اگر وہ کوئی برا کام کر بیٹھے تو پردہ پوشی کرو اور اگر اسے کوئی نعمت ملے تو اس کو مبارک باد دو اور اگر کوئی مصیبت پہنچے تو تعزیت کرو، اور اپنی عمارت اس کی عمارت سے اس طرح بلند نہ کرو کہ اس کے گھر کی ہوا بند ہو جائے اور (جب تمہارے گھر کوئی اچھا کھانا پکے تو اس کی کوشش کرو کہ) تمہاری ہانڈی کی مہک اس کے لئے (اور اس کے بچوں کے لئے) باعث ایذاء نہ ہو (یعنی اس کا اہتمام کرو کہ ہانڈی کی مہک اس کے گھر تک نہ جائے) الا یہ کہ اس میں سے تھوڑا سا کچھ اس کے گھر بھی بھیج دو (اس صورت میں کھانے کی مہک اس کے گھر تک جانے میں کوئی مضائقہ نہیں) (معارف الحدیث:1439)
مذکورہ حدیث اور اس طرح کی دیگر احادیث میں کسی خاص موقع پر پڑوسیوں کے گھر جانے کا حکم نہیں دیا گیا ہے، البتہ پڑوسیوں کے حقوق کو تفصیل سے بیان کیا گیا ہے، لہٰذا اگر مذکورہ خاتون ان حقوق کو بحسن خوبی ادا کررہی ہے تو محض پڑوسیوں کے گھر نہ جانے سے وہ گناہگار نہیں ہوگی، بشرطیکہ اس نہ جانے میں ناراضگی، حسد، تکبر اور غرور وغیرہ کا عنصر شامل نہ ہو۔