سوال: السلامُ علیکم ورحمۃاللہ! امید ہے آپ خیریت سے ہوں گے، میں الحمد اللہ بچوں کو قرآن پاک پڑھاتا ہوں، ایک بچے نے قرآن پاک حفظ مکمل کیا ہے، اس سلسلے میں ایک تقریب رکھی ہے، جس میں بچہ اپنا آخری سبق قل اتحآجّننا سے آخر پارہ تک تلاوت کرے گا، کیا الم پارہ کا آخری سبق یا آیات حفظ مکمل کی تقریب میں پڑھنا غلط ہے؟ رہنمائی فرمائیں

جواب: پوچھی گئی صورت میں چونکہ حافظ قرآن عام دنوں میں سبق سنانے کی طرح تکمیلِ حفظ قرآن کی تقریب میں اپنے آخری سبق کے طور پر الم پارہ کی آخری آیات سناتا ہے، اور اس کی تلاوت کرتا ہے، جس میں ایک طرح سے اس بچے کی حوصلہ افزائی بھی ہوتی ہے، لہذا اس موقع پر حافظ قرآن بچے کے لیے الم پارہ کے آخری سبق کی تلاوت کرنے میں کوئی حرج نہیں ہے، بشرطیکہ اسے لازم یا سنت نہ سمجھا جائے۔
واضح رہے کہ حفظ قرآن کی تکمیل کے موقع پر تقریب مقرر کرنا ایک مباح عمل ہے، بشرطیکہ اس میں دیگر خرافات و منکرات ( فضول خرچیاں، طلبہ سے دلی خوشی و رضامندی کے بغیر پیسے جمع کرنا، بے جا زیبائش اور نمائش، تصویر سازی، مسجد کی بے حرمتی وغیرہ) نہ ہوں۔