سوال: کیا گھریلو کاموں کے دوران بے دیہانی کے ساتھ درود شریف پڑھنے پر ثواب ملے گا؟

جواب: اگر کام کاج ایسا ہے کہ جس کے دوران انسان خاموش رہتا ہے، یعنی اس میں بات چیت کی ضرورت نہیں ہوتی ہے تو ایسے میں بجائے خاموش رہنے کے اگر درود شریف پڑھا جائے تو یقیناً یہ بڑی ہی سعادت اور توفیق الٰہی ہے، لہذا جتنا ممکن ہو سکے کام کاج کے دوران درود شریف پڑھنے کا اہتمام کرنا چاہیے۔
احادیث مبارکہ میں نبی کریم صلی اللہ علیہ وسلم پر بکثرت درود شریف پڑھنے کی ترغیب وارد ہوئی ہے، نیز کثرت کی کوئی متعین تعداد نہیں ہے، بلکہ یہ ہر شخص کے رسول اللّٰہ صلی اللّٰہ علیہ وسلم سے محبت وعقیدت پر مبنی ہے کہ وہ جس قدر چاہے درود شریف پڑھے۔ چنانچہ حضرت ابی بن کعب رضی اللہ تعالی عنہ بیان کرتے ہیں کہ انہوں نے رسول اللہ صلی اللہ علیہ وسلم سے کہا: "اے اللہ کے رسول! میں آپ پر زیادہ درود پڑھتا ہوں تو آپ صلی اللہ علیہ وسلم کا کیا خیال ہے کہ میں آپ پر کتنا درود پڑھوں؟ آپ صلی اللہ علیہ وسلم نے فرمایا: جتنا چاہو۔ میں نے کہا: چوتھا حصہ؟ آپ صلی اللہ علیہ وسلم نے فرمایا: جتنا چاہو اور اگر اس سے زیادہ پڑھو گے، تو وہ تمہارے لئے بہتر ہے۔ میں نے کہا: آدھا حصہ؟ آپ صلی اللہ علیہ وسلم نے فرمایا: جتنا چاہو اور اگر اس سے زیادہ پڑھو گے تو وہ تمہارے لئے بہتر ہے۔ میں نے کہا: دو تہائی؟ آپ صلی اللہ علیہ وسلم نے فرمایا: جتنا چاہو اور اگر اس سے زیادہ پڑھو گے تو وہ تمہارے لئے بہتر ہے۔ میں نے کہا: میں آپ پر درود ہی پڑھتا رہوں تو؟ آپ صلی اللہ علیہ وسلم نے فرمایا: تب تمھیں تمھاری پریشانی سے بچا لیا جائے گا اور تمھارے گناہ معاف کر دیے جائیں گے۔ (سنن ترمذی، حدیث نمبر: 2457)
اس حدیث کے الفاظ "جتنا چاہو" سے واضح طور پر معلوم ہوا کہ درود شریف کی کثرت کی کوئی تعداد شرعاً متعین نہیں ہے، البتہ فقہاء کرام نے سات جگہوں پر دورد شریف پڑھنے کو مکروہ لکھا ہے، لہذا ان کاموں کے دوران درود شریف کو موقوف کر دیا جائے۔
(1) جماع کے وقت (2) قضاء حاجت کے وقت (3) کسی چیز کو فروخت کرتے ہوئے اس کے تعارف کے وقت (4) کوئی ٹھوکر لگنے کے وقت (5) کسی بات پر تعجب کے وقت (6) جانور ذبح کرنے کے وقت (7) چھینک آنے پر۔