سوال: مفتی صاحب! شب براءت کے حوالے سے ایک عمل کی تصدیق درکار ہے۔ بزرگوں سے ثابت ہے کہ شب براءت کو نماز مغرب کے بعد سورہ یسین تین بار پڑھتے ہیں، اول بار عمر درازی کی نیت سے، دوسری بار بلاؤ کے دفع کرنے کے واسطے، تیسری بار خدا کے سوا کسی اور کا محتاج نہ ہونے کے لیے اور ہر بار سورہ یسین کے بعد درج ذیل دعا ایک بار پڑھتے ہیں۔
اللَّهُمَّ يَا ذَا الْمَنِّ وَلَا يُمَنُّ عَلَيْک، يَا ذَا الْجَلَالِ وَالإِكْرَامِ، يَا ذَا الطَّوْلِ وَالإِنْعَامِ. لَا إِلَهَ إِلَّا أَنْتَ ظَهْرَ اللَّاجِئينَ، وَجَارَ الْمُسْتَجِيرِينَ، وَأَمَانَ الْخَائِفِينَ. اللَّهُمَّ إِنْ كُنْتَ كَتَبْتَنِي عِنْدَكَ فِي أُمِّ الْكِتَابِ شَقِيًّا أَوْ مَحْرُومًا أَوْ مَطْرُودًا أَوْ مُقَتَّرًا عَلَيَّ فِي الرِّزْقِ، فَامْحُ اللَّهُمَّ بِفَضْلِكَ شَقَاوَتِي وَحِرْمَانِي وَطَرْدِي وَاقْتَارَ رِزْقِي، وَأَثْبِتْنِي عِنْدَكَ فِي أُمِّ الْكِتَابِ سَعِيدًا مَرْزُوقًا مُوَفَّقًا لِلْخَيْرَاتِ، فَإِنَّكَ قُلْتَ وَقَوْلُكَ الْحَقُّ فِي كِتَابِكَ الْمُنَزَّلِ عَلَى لِسَانِ نَبِيِّكَ الْمُرْسَلِ: يَمْحُو اللهُ مَا يَشَاءُ وَيُثْبِتُ وَعِنْدَهُ أُمُّ الْكِتَابِ، إِلَهِي بِالتَّجَلِّي الْأَعْظَمِ فِي لَيْلَةِ النِّصْفِ مِنْ شَهْرِ شَعْبَانَ الْمُكَرَّمِ، الَّتِي يُفْرَقُ فِيهَا كُلُّ أَمْرٍ حَكِيمٍ وَيُبْرَمُ، أَنْ تَكْشِفَ عَنَّا مِنَ الْبَلَاءِ مَا نَعْلَمُ وَمَا لَا نَعْلَمُ وَمَا أَنْتَ بِهِ أَعْلَمُ، إِنَّكَ أَنْتَ الْأَعَزُّ الْأَكْرَمُ، وَصَلَّى اللهُ عَلَى سَيِّدِنَا مُحَمَّدٍ النَّبِيِّ الأُمِّيِّ وَعَلَى آلِهِ وَصَحْبِهِ وَسَلَّمَ۔ اس دعا کی برکت سے اللہ تعالی ان کی حاجت روائی فرماتا ہے اور سال بھر تک تمام مصیبتوں سے محفوظ رکھتا ہے۔

جواب: سوال میں مذکور دعا آنحضرت صلى اللہ علیہ وسلم سے منقول نہیں ہے، لیکن مختلف کتبِ احادیث میں یہ دعائیہ کلمات حضرت عبد اللہ بن مسعود رضی اللہ عنہ کى نسبت سے منقول ہیں، اس اعتبار سے یہ دعا حدیث "موقوف" سے ثابت ہے، نيز اس دعا کے متعلق حضرت عبد اللہ بن مسعود رضی اللہ عنہ سے یہ ارشاد بھى منقول ہے: "جو شخص بھى یہ دعائیہ کلمات کہے گا تو اللہ تعالى اس کی روزى میں کشادگی فرمائیں گے"۔
اس سے معلوم ہوا کہ وسعتِ رزق کے لیے اس دعا کا مانگنا حضرت عبد اللہ بن مسعود رضی اللہ عنہ کا آزمودہ و مجرّب عمل ہے۔
البتہ اس حدیث میں یہ صراحت موجود نہیں ہے کہ حضرت عبد اللہ بن مسعود رضی اللہ عنہ اس دعا کو پندرہ شعبان کى رات ميں مانگا کرتے تھے، چنانچہ اس دعا کے آخر کے کلمات "إلهي بالتجلي الأعظم...الخ"حضرت ابن مسعود رضی اللہ عنہ سے منقول دعا کے آخر میں مذکوره نہیں ہیں، بلکہ جن بزرگوں نے اس دعا کو پندرہ شعبان کى رات میں پڑھنے کى تلقین فرمائى ہے، انہوں نے اس کا اضافہ فرمایا ہے۔
بہر حال! چونکہ یہ دعا وسعتِ رزق کے لیے حضرت عبد اللہ بن مسعود رضی اللہ عنہ اور سلف صالحین کے مجربات میں سے ہے، لہذا وسعتِ رزق کے لیے اس دعا کو عام دنوں میں اور پندرہ شعبان کى رات میں مانگا جا سکتا ہے۔ ذیل میں اس حدیث کى تخریج اور اسنادى حیثیت کو نقل کیا جاتا ہے۔
تخریج الحدیث:
1) اس دعا کو ابو عبد الرحمن الضبی رحمہ اللہ (م 195ھ) نے اپنى کتاب "الدعاء" ( ص 217 رقم الحدیث (52)، طبع: مکتبۃ الرشد)، میں نقل فرمایا ہے۔
2) حافظ ابن ابى شیبہ رحمہ اللہ (م 235ھ) نے اپنى کتاب "المصنف" (كتاب الدعاء/ ما جاء عن عبد الله بن مسعود رضي الله عنه، 15/ 272، رقم الحديث (30145)، ط: دار القبلة) میں نقل فرمایا ہے۔
3) حافظ ابن أبی الدنیا رحمہ اللہ (م 281ھ) (بحوالہ الدر المنثورللسيوطي) (8/ 471، مركز هجر للبحوث) میں نقل فرمایا ہے۔
4) امام بیہقی رحمہ اللہ (م 458ھ) نے اپنى کتاب "القضاء والقدر" (باب ذكر البيان أن ما كتب على ابن آدم وجرى به القلم، ص: 215، رقم الحديث (257): ط: مكتبة العبيكان)، میں نقل فرمایا ہے۔
مذکورہ حدیث کى اسنادى حیثیت:
یہ حدیث دو وجوہ سے ضعیف ہے:
1) اس حدیث کى سند میں ایک راوى "ابو شیبہ عبد الرحمن بن اسحاق الواسطى " ہیں، ان کے متعلق حافظ ابن حجر عسقلانى رحمہ اللہ (م 852ھ) نے "تقريب التهذيب" (ص: 336، رقم الترجمة (3799)، ط: دار الرشيد)، میں ضعیف ہونے کا قول نقل فرمایا ہے۔
2) اس حدیث کے راوى "قاسم بن عبد الرحمن" جو کہ حضرت عبد اللہ بن مسعود رضی اللہ عنہ کے پوتے ہیں، امام ابن أبی حاتم رحمہ اللہ (م 327ھ) نے اپنى کتاب "المراسیل" (ص: 175، رقم الترجمة (322)، ط: مؤسسة الرسالة)، میں نقل فرمایا ہے: ان کى سوائے حضرت جابر بن سمرۃ رضی اللہ عنہ کے کسى صحابى سے ملاقات ثابت نہیں ہے، لہذا ان کے اور حضرت عبد اللہ بن مسعود رضی اللہ عنہ کے درمیان انقطاع ہے۔
خلاصہ بحث:
یہ حدیث "موقوف" ہے، اگرچہ ضعیف ہے، لیکن یہ حضرت عبد اللہ بن مسعود رضی اللہ عنہ کا وسعتِ رزق کے لیے مجرب عمل ہے، نیز بزرگوں نے بھى اس کو مجرب قرار دیا ہے، لہذا پندرہ شعبان کى رات میں اور عام دنوں میں اس دعا سے فائدہ اٹھانا چاہیے۔