عنوان: مختلف عمر کے مختلف فضائل اور حق تعالی شانہ کا ان سے معاملہ

سوال: مسلمان کی عمر بڑھنے کے ساتھ اللہ تعالیٰ کا معاملہ بدلتا رہتا ہے، اس حدیث کی وضاحت فرما دیں۔

جواب: واضح رہے کہ مختلف عمر کے مختلف فضائل کے حوالہ سے ایک روایت "مسند ابی یعلی " میں ملتی ہے، جس کے تمام طرق ضعفاء و مجاہیل راویوں سے خالی نہیں ہیں، لیکن "مختلف عمر کے مختلف فضائل" مذکورہ مضمون پر مشتمل متعدد روایات "مسند احمد" میں اختصار کے ساتھ مذکور ہیں، ان کی سند پر بھی محدّثین عظام نے کلام کیا ہے، تاہم فضائل کے باب میں متعدد طرق سے منقول ہونے کی بناء پر تقویت ملنے کی وجہ سے روایات میں ذکر کردہ فضائل قابلِ قبول ہیں، جیسا کہ علامہ مناوی رحمہ اللہ نے روایت کے مختلف اجزاء کو متعدد طرق سمیت "مجمع الزوائد " میں نقل کیا ہے۔
تاہم "بچے کے اعمال والدین کے نامہ اعمال میں لکھے جانے "کے بارے میں اضافہ چونکہ صرف "مسندابی یعلی " والی روایت ہی میں ہے، اور اس کی سند کے رجال شدید ضعیف ہیں، اس بناء پر روایت میں جو "مختلف عمر کے مختلف فضائل" مذکور ہیں، وہ تو قابل قبول ہیں، لیکن مسند ابی یعلی والی روایت کا " اضافی حصہ" (بچے کے اعمال والدین کےنامہ اعمال میں لکھے جائیں گے) راریوں کے شدید ضعیف ہونے کی وجہ سے آگے نقل کرنا درست نہیں۔
ذیل میں مسند احمد اور مسند ابی یعلی دونوں روایات کا ترجمہ ذکر کیا جاتا ہے:
"مسند احمد" والی روایت کا ترجمہ:
رسول اللہ ﷺ فرماتے ہیں: "جب مسلمان بندہ چالیس سال کا ہو جاتا ہے تو اللہ تعالیٰ تین طرح کی بلائیں دور کر دیتا ہے: جنون، کوڑھ اور برص، جب پچاس سال کا ہوجاتا ہے تو اللہ تعالیٰ اس کے حساب میں تخفیف کر دیتا ہے، اور جب ساٹھ سال کا ہوجاتا ہے تو اللہ تعالیٰ اسے اپنی طرف جھکنا نصیب فرما دیتا ہے اور جب ستر سال کی عمر کا ہو جاتا ہے تو آسمان والے اس سے محبت کرنے لگتے ہیں اور جب اسّی سال کا ہو جاتا ہے تو اللہ تعالیٰ اس کی نیکیاں ثابت رکھتا ہے، اور اس کی برائیاں مٹا دیتا ہے، جب نوّے سال کا ہوتا ہے تو اللہ تعالیٰ اس کے اگلے پچھلے گناہ معاف فرماتا ہے اور اس کے گھرانے کے آدمیوں کے بارے میں اسے شفاعت کرنے والا بنا دیتا ہے، نیز آسمانوں میں لکھ دیا جاتا ہے کہ یہ اللہ کی زمین میں اس کا قیدی ہے اور اس کے گھر والوں کے حق میں اس کی سفارش قبول فرماتا ہے۔ (مسند الإمام أحمد بن حنبل، حدیث أبي رمثة -رضي الله عنه-،13/21، الناشر: مؤسسة الرسالة)
"مسند ابی یعلی موصلی" والی روایت کا ترجمہ:
حضرت انس بن مالک رضی اللہ عنہ سے روایت ہے، انہوں نے روایت کو نبیﷺ کی جانب نسبت کرکے ذکر کیا ہے کہ نومولود بچہ جب تک بلوغت کی عمر کو نہیں پہنچ جاتا اس کی نیکیاں اس کے والد یا والدین کے نامہ اعمال میں لکھی جاتی ہیں، البتہ اس کی برائیاں والد یا والدین کے نامہ اعمال میں نہیں شامل کی جائیں گی۔ جب وہ بلوغت کی عمر کو پہنچ جاتا ہے تو تقدیر لکھ دی جاتی ہے، اور دونوں فرشتے اس کی حفاظت پر مامور کردیئے جاتے ہیں۔ جب مسلمان بندہ چالیس سال کا ہو جاتا ہے تو اللہ تعالیٰ تین طرح کی بلائیں دور کر دیتا ہے: جنون، کوڑھ اور برص۔۔۔۔۔الخ (آگے" مسند احمد" والی روایت ہی کا مضمون وارد ہے) (مسند أبي يعلى الموصلي، للإمام الحافظ أحمد بن على بن المثنى التميمي (210 - 307 هـ)، (مسند أنس بن مالک، 400/5، تخريج وتعليق: سعيد بن محمد السناري، الناشر: دار الحديث – القاهرة)