عنوان: نبیﷺ کا پاکیزہ نسب اور اس میں حضرت ابراہیم علیہ السلام کے والد"آزر" سے متعلق اشکال

سوال: آپ ﷺ کی حدیث کا مفہوم ہے کہ میرے شجرہ نسب میں کفر کا شبہ بھی نہیں ہے، جبکہ آذر حضرت ابراھیم علیہ السلام کے والد آپ ﷺ کے شجرہ نسب میں آتے ہیں، مہربانی فرما کر مستند اور مدلل جواب عنایت فرما دیں۔

جواب: واضح رہے کہ نبیﷺ کے نسب کی پاکیزگی و طہارت کے حوالہ سے مختلف روایات ملتی ہیں، جس کی سند پر محدّثین عظام رحمہم اللہ نے کلام کیا ہے، تاہم وہ قابلِ قبول ہیں۔ ان میں بعض روایات مطلقاً جبکہ بعض میں صراحت ملتی ہے کہ اس میں طہارت و پاکیزگی سے مراد نسب کا بدکاری، زنا اور غیر اخلاقی حرکات سے محفوظ ہونا ہے، اس سے طہارت ایمانی مراد نہیں۔ ( فیض القدیر، حرف الحاء، 437/3، الناشر: المكتبة التجارية الكبرى – مصر )
ذیل میں ان روایات کا ترجمہ ذکر کیا جاتا ہے:
حضرت واثلہ بن اسقع رضی اللہ عنہ سے روایت ہے کہ رسول اللہﷺ نے ارشادفرمایا:" اللہ ربّ العزت نے(میرے نسب کے لیے) اسماعیل علیہ السلام کی اولاد سے "خاندانِ کنانہ" کا انتخاب کیا، اور اس میں" خاندانِ قریش" کو اختیار کیا، اور اس میں ٗ"خاندان بنو ہاشم" کو خاص کیا، اور بنو ہاشم میں مجھے نبوت سے سرفراز کیا"۔ (صحيح مسلم ، کتاب الفضائل، باب فضل نسب النبی ﷺ، 1783/4، الناشر: مطبعة عيسى البابي الحلبي، القاهرة)
حضرت علی رضی اللہ عنہ سے روایت ہے کہ نبیﷺ نے ارشاد فرمایا:" میں نکاح سے پیدا شدہ ہوں، بدکاری سے وجود میں نہیں آیا، اور میرے نسب میں حضرت آدم سے میرے والدین تک بدکاری کا ثبوت نہیں"۔ (المعجم الأوسط،باب العین، من اسمه: محمد، 80/5، الناشر: دار الحرمين – القاهرة)
حضرت ابن عباس رضی اللہ عنہما سے روایت ہے کہ رسول اللہﷺ نے ارشاد فرمایا: "میرے والدین کبھی زنا میں ملوّث نہیں ہوئے، اللہ عزّوجل مجھے پاکیزہ پشتوں سے پاک ارحام کی جانب منتقل کرتا رہا، جو انتہائی صاف اور پاکیزہ سلسلہ تھا، جہاں کہیں سلسلۂ نسب دو شاخوں میں تقسیم ہوا میں ان میں سے بہتر شاخ میں رہا"۔ (دلائل النبوة، الفصل الأول، ذکر فضیلته ﷺ حسبه ونسبه، رقم الصفحة: 57، الناشر: دار النفائس، بيروت)
حضرت ابراہیم علیہ السلام کے والد"آزر" سے متعلق محقّق بات:
لفظ"آزر" سے متعلق اکثر اہل لغت کی رائے یہ ہے کہ یہ لفظ "تارخ" سےمعرّب ہے، چونکہ تعریب کا کوئی مقررہ ضابطہ نہیں، بعض الفاظ و اسماء میں خفیف سا تغیر ہوتا ہے، بآسانی سمجھا جاسکتا ہے کہ یہ کس لفظ کی تعریب ہے، جیسے ابراہیم و ابراہام اور ہارون وہاران، جبکہ بعض الفاظ تعریب کے قالب میں ڈھل کر کچھ سے کچھ بن جاتے ہیں۔ (تفصیلی دلائل کے لیے مولانا ادریس میرٹھی کا مضمون بعنوان "آزر" ملاحظہ ہو، بینات اردو، صففر المصفر 1438ھ)
آزر کا کون تھے؟
اس حوالہ سے دو قول ملتے ہیں، بعض مفسّرین کی رائے یہ ہے کہ یہ حضرت ابراہیم علیہ السلام کے چچا تھے، اس قول کو اختیار کرنے والی جماعت کا مقصد نبیﷺ کے دادا عبدالمطلب سے تمام اجداد نبیﷺ کو مؤمن وموحد ثابت کرنا ہے، مگر جمہور کا موقّف یہ ہے کہ ان کے والد تھے، اور حضورﷺ کے تمام اجداد کو مؤمن قراردیا جانا ایک مخصوص جماعت کا عقیدہ ہے، جس پر کوئی معتبر دلیل نہیں۔ (التفسير الكبير، سورة الأنعام ، الآیة: 74 ، الناشر: دار إحياء التراث العربي – بيروت)
اسی طرح حضرت مولانا حفظ الرحمن صاحب سیوہاروی رحمہ اللہ آزر کے متعلق مختلف اقوال نقل کرنے کے بعد فرماتے ہیں:
ہمارے نزدیک یہ تمام تکلّفات باردہ ہیں، اس لیے کہ قرآن عزیز نے جب صراحت کے ساتھ آزر کو اب ابراہیم (ابراہیم علیہ السلام کا باپ) کہا ہے تو پھر علمائے انساب اور بائبل کے تخمینی قیاسات سے متاثر ہو کر قرآن عزیز کی یقینی تعبیر کو مجاز کہنے یا اس سے بھی آگے بڑھ کر خواہ مخواہ قرآن عزیز میں نحوی مقدرات ماننے پر کونسی شرعی اور حقیقی ضرورت مجبور کرتی ہے الخ۔۔۔ پس بلا شبہ تاریخ کا تارخ (جو سب کے نزدیک بلا شبہ حضرت ابراہیم علیہ السلام کے والد کا نام ہے) آزر ہی ہے اور علم اسمی ہے۔ (قصص القرآن، ۱: ۱۲۰، ۱۲۱)