سوال: مولوی صاحب! کیا شرعی لحاظ سے کوئی آیت، حدیث یا کوئی جوازعورت کی حکمرانی کا ملتا ہے؟

جواب: اسلام ایک مكمل ضابطۂ حیات اور فطری نظام ہے اور ہر لحاظ سے کامل اور مکمل ہے، چنانچہ دیگر نظاموں کے برخلاف سربراہِ مملکت اور حاکم کے لیے اسلام نے ایک مکمل حکم جاری فرمایا ہے اور حکمرانی کا اہل اس کو قرار دیا ہے جس میں اس کے بیان کردہ خاص اوصاف اور شرائط پائی جائیں، ان شرائط میں سے ایک اہم شرط حاکم کا "مرد" ہونا ہے، جو درج ذیل حدیث سے ثابت ہے:
"لن يفلح قوم ولوا أمرهم امرأة". (صحیح البخاري: 7099)
"وہ قوم ہرگز فلاح نہیں پائے گی، جس نے اپنے اوپر کسی عورت کو حاکم بنالیا ہو"۔
اور اس شرط کی وجہ یہ ہے کہ اسلام ایک فطری نظام ہے اور فطرت کی رعایت رکھتے ہوئے احکامات صادر کرتا ہے اور فطری لحاظ سے عورت امورِ خانہ داری، اولاد کی تربیت اور گھر کے اندر کے کاموں کے لیے مختص ہے، جبکہ مرد کسبِ معاش اور دیگر باہر کے کاموں کا ذمہ دار ہے اور انہی ذمہ داریوں میں سے ایک بڑی ذمہ داری حکمرانی ہے، چنانچہ حکمرانی اور قیادت کے سلسلے میں گھر سے باہر نکلنا، مختلف لوگوں سے ملنا جلنا، ان کے ساتھ اٹھنا بیٹھنا اور سفر کرنا پڑتا ہے، جبکہ عورت کو بلا ضرورت گھر سے باہر نہ نکلنے کی تعلیم اور ترغیب دی گئی ہے، اس لیے عورت کو قیادت سنبھالنے سے منع کیا گیا ہے۔ نیز قرآن کریم میں میں بھی اس بات کی طرف اشارہ دیا گیا ہے کہ حکمرانی کا حقیقی حق دار اور ذمہ دار مرد ہے، ارشاد باری تعالیٰ ہے:
اَلرِّجَالُ قَوَّامُوۡنَ عَلَى النِّسَآءِ بِمَا فَضَّلَ اللّٰهُ بَعۡضَهُمۡ عَلٰى بَعۡضٍ وَّبِمَاۤ اَنۡفَقُوۡا مِنۡ اَمۡوَالِهِمۡ‌ ؕ (النساء: الایة: 34)
ترجمہ: "مرد عورتوں کے نگران ہیں، کیونکہ اللہ نے ان میں سے ایک کو دوسرے پر فضیلت دی ہے، اور کیونکہ مردوں نے اپنے مال خرچ کیے ہیں"۔
لہذا قرآن وسنت کی تعلیمات کی روشنی میں عورت کو خود مختار حاکم بنانا شرعاً جائز نہیں ہے، تاہم عورت چونکہ مشورہ کی اہل ہے، اس لئے شرعی حدود کی رعایت رکھتے ہوئے عورت کو مجلس شوری کا ممبر اور رکن بنایا جاسکتا ہے۔