سوال: 1) مسئلہ یہ پوچھنا ہے کہ پانچ مرلے کا گھر ہے، جو وراثت میں تقسیم کرنا چاہتے ہیں، لیکن اس کو بیچنا نہیں چاہتے، یہ گھر والد صاحب نے کسی وجہ سے بڑے بیٹے کے نام کیا تھا، اب وہ بہنوں کو ان کا حق دینا چاہتے ہیں، لیکن گھر نہیں بیچنا چاہتے، کیونکہ وہ مزدور آدمی ہے، کبھی ان کی دہاڑی لگتی ہے، کبھی نہیں، جس کی وجہ سے وہ گھر کرایہ پر نہیں لے سکتے۔ اب وراثت کی کیا صورت ہوسکتی ہے کہ گھر بھی نہ بکے اور سب کو ان کے حصے بھی مل جائیں؟
2) ہم تین بہنیں اور دو بھائی ہیں اور ہماری والدہ بھی حیات ہیں اور اس گھر کے بنانے میں پانچ چھ لاکھ روپے بھی چھوٹے بیٹے نے لگائے ہیں، کیا چھوٹے بھائی کو وہ پانچ لاکھ روپے بھی ملیں گے؟

جواب: 1) پوچھی گئی صورت میں یہ طریقہ اختیار کیا جا سکتا ہے کہ جو بھائی یہ مکان فروخت نہیں کرنا چاہتا ہے تو وہ اس مکان کو باہمی رضامندی سے جس قیمت پر معاملہ طے ہوجائے، اس قیمت پر خرید لے اور دیگر ورثاء کو ان کا شرعی حصہ ادا کردے۔
2) اگر چھوٹے بیٹے نے دیگر ورثاء کی اجازت سے قرض کی صراحت کے ساتھ تعمیرات میں پیسے لگائے ہوں تو وراثت میں اپنے حصہ کے علاوہ اس کو یہ پیسے بھی ملیں گے، اور اگر قرض کی صراحت یا دیگر ورثاء کی اجازت کے بغیر صرف اپنے لیے لگائے ہوں تو یہ پیسے نہیں ملیں گے، اور اگر سب کے لیے لگائے ہوں تو ملبے کی قیمت ملے گی۔